விழுப்புரம்: திரைப்படப் பாணியில் அரங்கேறிய ஒரு கொடூரக் கொலைச் சம்பவம் விழுப்புரம் மாவட்டத்தையே உலுக்கியுள்ளது. காதலித்தவரைத் திருமணம் செய்ய மறுத்ததோடு, பண விவகாரத்தில் ஏற்பட்ட மோதலால் முன்னாள் காதலனுடன் சேர்ந்து இயக்குநரைத் துடிக்கத் துடிக்கக் கொலை செய்த துணை நடிகையின் விபரீத முகம் வெளிச்சத்திற்கு வந்துள்ளது.
விழுப்புரம் மாவட்டம் அரகண்டநல்லூர் அடுத்த மதுரா வேடாளம் கிராமத்தில் உள்ள ஒரு சவுக்குத் தோப்பில், கடந்த 7-ம் தேதி பயங்கர துர்நாற்றம் வீசியது. அங்கு சென்று பார்த்த பொதுமக்கள், முகம் சிதைந்து அழுகிய நிலையில் ஒரு இளைஞரின் சடலம் கிடப்பதைக் கண்டு அதிர்ச்சியடைந்து போலீஸாருக்குத் தகவல் கொடுத்தனர். விரைந்து வந்த அரகண்டநல்லூர் போலீஸார் சடலத்தைக் கைப்பற்றி தீவிர விசாரணை நடத்தினர்.
போலீஸாரின் முதற்கட்ட விசாரணையில், கொலை செய்யப்பட்டு கிடந்தவர் திருநெல்வேலி மாவட்டம், நந்திக்கரை அணை குறிச்சி கிராமத்தைச் சேர்ந்த ஜெயக்குமார் (வயது 28) என்பதும், அவர் சென்னையில் தங்கி குறும்பட இயக்குநராகப் பணியாற்றி வந்ததும் தெரியவந்தது.
சம்பவ இடத்தில் பதிவான செல்போன் எண்களை ஆய்வு செய்தபோது, துணை நடிகையான பூஜா என்பவருடன் ஜெயக்குமாருக்குத் தொடர்பு இருப்பது தெரியவந்தது. பூஜா மற்றும் ஜெயக்குமார் இருவரும் கடந்த 5 ஆண்டுகளாகக் காதலித்து வந்துள்ளனர். இடையில் இருவருக்கும் இடையே கருத்து வேறுபாடு ஏற்பட்டுள்ளது. பூஜா திடீரென ஜெயக்குமாருடன் பேசுவதைத் தவிர்த்துள்ளார்.
இதனால் ஆத்திரமடைந்த ஜெயக்குமார், காதலித்த காலத்தில் பூஜாவிற்குத் தான் கொடுத்த பணத்தைத் திருப்பித் தரும்படி கேட்டுள்ளார். மேலும், தன்னையே திருமணம் செய்துகொள்ள வேண்டும் என்றும், இல்லையெனில் போலீஸில் புகார் அளிப்பேன் அல்லது கொலை செய்துவிடுவேன் என்றும் பூஜாவை மிரட்டியதாகக் கூறப்படுகிறது.
ஜெயக்குமாரின் தொல்லை தாங்க முடியாமல் போனதால், அவரைத் தீர்த்துக்கட்ட பூஜா முடிவு செய்தார். இதற்காகத் தனது முன்னாள் காதலனான கடப்பேரியைச் சேர்ந்த தேவா என்பவரின் உதவியை நாடினார். இருவரும் சேர்ந்து ஜெயக்குமாரைக் கொலை செய்யத் திட்டம் தீட்டினர்.
திட்டமிட்டபடி கடந்த 3-ம் தேதி மாலை, சமாதானம் பேசுவதாகக் கூறி ஜெயக்குமாரை பில்ராம்பட்டு சவுக்குத் தோப்புப் பகுதிக்கு வரவழைத்துள்ளனர். அங்கு மறைந்திருந்த பூஜா, தேவா மற்றும் அவர்களது கூட்டாளிகள் ஜெயக்குமாரைச் சூழ்ந்துகொண்டு கத்தியால் குத்திக் கொடூரமாகக் கொலை செய்தனர். பின்னர் அடையாளங்கள் தெரியாமல் இருக்கச் சடலத்தைச் சிதைத்துவிட்டுத் தப்பிச் சென்றனர்.
செல்போன் சிக்னல் மற்றும் ரகசியத் தகவல்களின் அடிப்படையில் போலீஸார் தீவிர வேட்டை நடத்தினர். இதில் துணை நடிகை பூஜா, அவரது முன்னாள் காதலன் தேவா, மற்றும் அவர்களுக்கு உடந்தையாக இருந்த ஐயப்பன், துர்கா, குப்புசாமி, சடையாண்டி, பூங்காவனம், ஹரிகரன், சீனிவாசன் மற்றும் இரண்டு சிறுவர்கள் என மொத்தம் 9 பேரை போலீஸார் கைது செய்தனர்.
கைது செய்யப்பட்டவர்கள் மீது கொலை வழக்கு மற்றும் தடயங்களை அழித்தல் ஆகிய பிரிவுகளின் கீழ் வழக்குப் பதிவு செய்யப்பட்டு, நீதிமன்றத்தில் ஆஜர்படுத்தப்பட்டு சிறையில் அடைக்கப்பட்டனர்.
சினிமா வாய்ப்புக்காகச் சென்னைக்கு வந்த இளைஞர், ஒரு துணை நடிகையின் மோகத்தால் உயிரை இழந்த சம்பவம் அந்தப் பகுதியில் பெரும் சோகத்தையும் பரபரப்பையும் ஏற்படுத்தியுள்ளது.
