टी20 वर्ल्डकप 2026 स्पर्धेत अभिषेक शर्माची बॅट शांत होती. पहिल्या तीन सामन्यात शून्यावर बाद झाल्याने त्याच्या फलंदाजीवर अनेकांनी शंका घेतली. सुपर 8 फेरीत झिम्बाब्वेविरुद्धच्या सामन्यात अर्धशतकी खेळी केली. पण त्यानंतर पुन्हा एकदा फलंदाजीला ग्रहण लागलं. असं असताना अंतिम सामन्यात त्याची बॅट चांगलीच तळपली. त्यामुळे टीम इंडियाला मोठी धावसंख्या करण्यास मदत झाली. असं असताना अभिषेक शर्मा आता आयपीएल 2026 स्पर्धेत आपल्या फलंदाजीची धार दाखवण्यास सज्ज आहे. त्याची झलक त्याने सराव सामन्यात दाखवून दिली. आयपीएल स्पर्धेची तयारी अंतिम टप्प्यात असताना सनरायझर्स हैदराबादने सराव सामना खेळला. या सराव सामन्यात कर्णधार इशान किशन काही खास करू शकला नाही. पण अभिषेक शर्माचं वादळ मात्र घोंघावलं. त्याने 94 धावांची खेळी आणि त्याचं शतक फक्त 6 धावांनी हुकलं.

सनरायझर्स हैदराबादने होमग्राउंड राजीव गांधी आंतरराष्ट्रीय स्टेडियममध्ये पहिला सराव सामना खेळला. हा सामना स्कॉडमधील खेळाडू दोन संघात विभागून खेळण्यात आला. यावेळी अभिषेक शर्मा, इशान किशन, हेनरिक क्लासेन, लियाम लिव्हिंगस्टोनसारखे दिग्गज फलंदाज एकाच संघात होते. इशान किशन आणि अभिषेक शर्मा ही जोडी मैदानात उतरली होती. पहिल्यांदा फलंदाजी करताना या संघाने आक्रमक फटकेबाजी केली. पण इशान किशन 14 चेंडूत फक्त 18 धावा करून बाद झाला. त्यानंतर अभिषेक शर्माने गोलंदाजांना आपला इंगा दाखवला. त्याने गोलंदाजांना सळो की पळो करून सोडलं. त्याने फक्त 27 चेंडूत शतक ठोकलं.

अभिषेक शर्माने 42 चेंडूत 94 धावांची खेळी केली. त्याने स्ट्रेट आणि कव्हरच्या दिशेने सर्वाधिक फटकेबाजी केली. पण लाँग ऑफच्या दिशेने फटका मारताना चुकला आणि झेल बाद झाला. इंग्लंडचा वेगवान गोलंदाज ब्रायडन कार्सच्या गोलंदाजीवर विकेट गेली. हेनरिक क्लासेन आणि अभिषेक शर्मा हे दोघंही 15 धावांच्या आसपास होते. पण अभिषेक शर्माने गिअर टाकला आणि धावांची गती वाढवली. त्यामुळे एका बाजूने हेनरिक क्लासेन फक्त पाहात राहिला. या संघाने फक्त 13 षटकात 160 धावांचा पल्ला गाठला. सनरायझर्स हैदराबादचा पहिला सामना 28 मार्च रोजी रॉयल चॅलेंजर्स बंगळुरूशी होणार आहे. हा सामना चिन्नास्वामी स्टेडियममध्ये होणार आहे. त्यामुळे कोण बाजी मारते? याची उत्सुकता आहे.