Ashok Kharat: नाशिकमध्ये उघडकीस आलेल्या अशोक खरात (Ashok Kharat) प्रकरणाचा तपास जसजसा पुढे सरकत आहे, तसतसे नवे आणि धक्कादायक तपशील समोर येत आहेत. विशेष तपास पथकाने (SIT) केलेल्या चौकशीत शनिवारी एक नाट्यमय घडामोड घडली. खरात आणि त्याचा ऑफिसबॉय नीरज जाधव (Neeraj Jadhav) या दोघांना समोरासमोर बसवून चौकशी करण्यात आली असता, दोघांमध्ये पोलिसांसमोरच जोरदार शाब्दिक वाद झाल्याची माहिती समोर आली आहे. तसेच ऑफिसबॉय नीरज जाधवच्या सीडीआरमध्ये 30 ते 40 महिलांचे संपर्क क्रमांक आढळले आहेत. त्यामुळे आता एसआयटीच्या हाती महत्त्वाचे पुरावे समोर येण्याची शक्यता वर्तवली जात आहे.
एसआयटीकडून नीरज जाधवचा कॉल डिटेल रेकॉर्ड (CDR) तपासण्यात आला असून, सीडीआरमध्ये 30 ते 40 महिलांचे नंबर सापडल्याची माहिती मिळत आहे. नीरज जाधवच महिलांना अशोक खरातचे निरोप देत असल्याची माहिती सूत्रांनी दिली आहे. फोकस प्रॉपर्टी येथे ऑफिसबॉय असताना सल्ला घेण्यासाठी येणाऱ्या महिलांच्या नीरज जाधव संपर्कात असल्याने त्याचे कारनामे आता उघड होणार आहेत. या प्रकरणाचा मास्टरमाईंड नीरज जाधवच्या सीडीआरमधून आता महत्त्वाचे पुरावे समोर येण्याची शक्यता वर्तवली जात आहे. तर आता भोंदूबाबाची संपूर्ण कुंडली उघड होण्याची देखील शक्यता व्यक्त होत आहे.
दरम्यान, अशोक खरात आणि नीरज जाधवची एसआयटीकडून समोरासमोर चौकशी करण्यात आली. यावेळी दोघांमध्ये जोरदार खडाजंगी झाल्याची माहिती सूत्रांकडून मिळत आहे. माहिती देण्याच्या मुद्द्यावरून दोघांमध्ये तीव्र वाद निर्माण झाला आणि परिस्थिती काही काळ तणावपूर्ण बनली होती. तर, अशोक खरातची शनिवारी एसआयटीकडून तब्बल सात तास चौकशी करण्यात आली.
आज रविवारी देखील अशोक खरात प्रकरणात एसआयटीचे अधिकारी हिमांशू पोलीस क्लब येथे चौकशीसाठी दाखल झाले आहेत. अशोक खरातची आज पुन्हा एसआयटीमार्फत चौकशी करण्यात येणार आहे. तर भोंदू अशोक खरात प्रकरणात आता आयकर विभागाची देखील एन्ट्री झाली आहे. खरातची एसआयटी चौकशी सुरू असतानाच आता आर्थिक चौकशीला देखील वेग येणार आहे. खरातच्या मालमत्ता आणि कोट्यवधींच्या व्यवहारांची सखोल तपासणी होणार आहे. त्याचे उत्पन्नाचे स्त्रोत आणि आयकर विवरणपत्रांची पडताळणी होणार असून देणगीदार, भागीदार आणि आर्थिक मदत करणारे देखील रडारवर असल्याची माहिती समोर येत आहे. त्यामुळे अशोक खरातच्या आर्थिक जाळ्याचा मोठा खुलासा होण्याची शक्यता व्यक्त केली जात आहे.
आणखी वाचा
