தேர்தல் பத்திரங்கள் விவகாரத்தில் பெரும் சர்ச்சைக்குள்ளான லாட்டரி அதிபர் மார்ட்டினின் குடும்பத்தினர், வரவிருக்கும் சட்டமன்றத் தேர்தலில் தமிழகம் மற்றும் புதுச்சேரியில் தேசிய ஜனநாயகக் கூட்டணி (NDA) சார்பில் களம் இறங்கியுள்ளனர். இது அரசியல் வட்டாரத்தில் பெரும் விவாதத்தைக் கிளப்பியுள்ளது.

யார் எங்கே போட்டி?

தமிழகத்தில் தாய்: லாட்டரி மார்ட்டினின் மனைவி லீமா ரோஸ், கடந்த பிப்ரவரி மாதம் எடப்பாடி பழனிசாமி முன்னிலையில் அதிமுகவில் இணைந்தார். இணைந்த சில நாட்களிலேயே அவருக்கு மகளிர் அணி இணைச் செயலாளர் பதவி வழங்கப்பட்டது. தற்போது அதிமுக வெளியிட்டுள்ள இரண்டாம் கட்ட வேட்பாளர் பட்டியலில், திருச்சி மாவட்டத்தின் லால்குடி தொகுதி வேட்பாளராக அவர் அறிவிக்கப்பட்டுள்ளார்.

புதுவையில் மகன்: மார்ட்டினின் மகன் ஜோஸ் சார்லஸ் மார்ட்டின், புதுச்சேரியில் 'லட்சிய ஜனநாயக கட்சி' என்ற புதிய கட்சியைத் தொடங்கியுள்ளார். பாஜக தலைமையிலான தேசிய ஜனநாயகக் கூட்டணியில் அங்கம் வகிக்கும் இவருக்கு 'தர்பூசணி' சின்னம் ஒதுக்கப்பட்டுள்ளது. அவர் காமராஜர் நகர் மற்றும் நெல்லித்தோப்பு ஆகிய இரு தொகுதிகளில் போட்டியிடுகிறார்.

சர்ச்சையின் பின்னணி:

தேர்தல் பத்திரங்கள் மூலம் லாட்டரி மார்ட்டின் நிறுவனம் திமுகவிற்கு ரூ. 509 கோடியும், பாஜகவிற்கு ரூ. 100 கோடியும், திரிணமூல் காங்கிரஸிற்கு ரூ. 542 கோடியும் நன்கொடையாக வழங்கியதாகத் தகவல்கள் வெளியாகிப் பெரும் அரசியல் அதிர்வலைகளை ஏற்படுத்தியிருந்தது. இத்தகைய சூழலில், அவரது குடும்ப உறுப்பினர்களுக்கு முக்கியக் கட்சிகள் வாய்ப்பு வழங்கியிருப்பது விமர்சனங்களுக்கு உள்ளாகியுள்ளது.

ஒரே குடும்பத்தைச் சேர்ந்த இருவர் வெவ்வேறு மாநிலங்களில் ஒரே கூட்டணியின் கீழ் போட்டியிடும் நிலையில், இதே குடும்பத்தைச் சேர்ந்த மார்ட்டினின் மருமகனும், தமிழக வெற்றிக் கழகத்தின் (TVK) முக்கிய நிர்வாகியுமான ஆதவ் அர்ஜுனா எந்தத் தொகுதியில் போட்டியிடுவார் என்ற எதிர்பார்ப்பும் அதிகரித்துள்ளது. லாட்டரி தொழிலுடன் தொடர்புடைய ஒரு குடும்பம் நேரடியாகத் தேர்தல் அரசியலில் இவ்வளவு தீவிரமாக இறங்கியிருப்பது 2026 தேர்தலின் முக்கிய நகர்வுகளில் ஒன்றாகப் பார்க்கப்படுகிறது.