DGCA VVIP flights Rule: व्हीआयपी आणि व्हीव्हीआयपी (जसे की मुख्यमंत्री, राज्यपाल इत्यादी) यांना घेऊन जाणाऱ्या अनियोजित विमान आणि हेलिकॉप्टर ऑपरेटर्ससाठी नवीन मार्गदर्शक तत्त्वे जारी करण्यात आली आहेत. डीजीसीएने स्पष्टपणे म्हटले आहे की, उड्डाण कर्मचाऱ्यांवर कोणताही दबाव आणला जाऊ नये, जेणेकरून सुरक्षेशी तडजोड होणार नाही. डीजीसीएच्या मते, व्हीआयपींच्या गरजा पूर्ण करण्यासाठी शेवटच्या क्षणी होणारे बदल केवळ ऑपरेटर व्यवस्थापनामार्फतच केले जावेत, थेट कर्मचाऱ्यांकडून नाही. हवामानाच्या नियमांचे पालन करणे आवश्यक आहे आणि कर्मचाऱ्यांच्या निर्णयांचा आदर केला पाहिजे.

तर वैमानिक थेट नकार देऊ शकतो 

नवीन मार्गदर्शक तत्त्वांमुळे व्हीआयपींच्या प्रवासामुळे वैमानिकांना थकवा येणार नाही याची खात्री होते. आता, जर कोणत्याही नेत्याने दबाव आणला, तर वैमानिक थेट नकार देऊ शकतो आणि त्याची जबाबदारी व्यवस्थापनाची असेल, वैयक्तिक वैमानिकाची नाही. 28 जानेवारी रोजी बारामती विमानतळावर झालेल्या विमान अपघातात अजित पवार यांच्यासह पाच जणांचा मृत्यू झाला होता. या घटनेनंतर, डीजीसीएने व्हीआयपींच्या प्रवासासंबंधीच्या नियमांमध्ये सुधारणा केली आहे.

बंगळूरमध्ये झिरो एफआयआर दाखल

दरम्यान, बारामती विमान अपघातात उपमुख्यमंत्री अजित पवार यांच्या मृत्यू प्रकरणी बंगळूरमध्ये झिरो एफआयआर दाखल करण्यात आला आहे. त्यांचे पुतणे आणि राष्ट्रवादी काँग्रेस (सपा) पक्षाचे आमदार रोहित पवार यांच्या तक्रारीच्या आधारे हा एफआयआर दाखल करण्यात आला आहे. त्यांनी या अपघाताला एक गुन्हेगारी कट असल्याचे म्हटले आहे. त्यांनी एफआयआरमध्ये पाच मुख्य आरोप केले आहेत. रोहित यांनी सांगितले की, त्यांनी मुंबईतील मरीन ड्राइव्ह पोलीस स्टेशन, बारामती पोलीस आणि महाराष्ट्र सीआयडी यांच्याशी संपर्क साधला होता, परंतु कोणताही एफआयआर दाखल झाला नाही. त्यानंतर, त्यांनी 23 मार्च रोजी बंगळूरमध्ये झिरो एफआयआर दाखल केला. ज्या पोलीस स्टेशनमध्ये गुन्हा घडला आहे, ते सोडून देशातील इतर कोणत्याही पोलीस स्टेशनमध्ये झिरो एफआयआर नोंदवला जातो. त्यानंतर तो संबंधित पोलीस स्टेशनकडे वर्ग केला जातो. कर्नाटक पोलिसांनी हा गुन्हा नोंदवून तो महाराष्ट्र पोलिसांकडे वर्ग केला.

रोहित पवारांचे एफआयआरमध्ये पाच आरोप 

• अधिकृत नोंदीनुसार विमानाने 4915तास उड्डाण केले होते, तर प्रत्यक्षात विमानाने 8000 तासांहून अधिक उड्डाण केल्याचा दावा आहे.
• कमी दृश्यमानता असूनही, व्हिज्युअल फ्लाईट नियमांनुसार विमानाला उतरण्याची परवानगी देण्यात आली.
• ऐनवेळी क्रू बदलण्यात आला आणि पायलट सुमित कपूर यांचा समावेश करण्यात आला.
• अपघाताच्या काही काळापूर्वी, व्हीएसआर व्हेंचर्सने पायलट सुमित कपूर यांच्या नावाने जीवन विमा पॉलिसी काढली होती.
• पायलट सुमित कपूर यांना यापूर्वी दारूशी संबंधित गुन्ह्यांसाठी निलंबित करण्यात आले होते.

अजितदादांचे विमान झाडांवर आदळले

विमान अपघात तपास ब्युरोने (AAIB) बारामती विमान अपघातावर 22 पानी प्राथमिक अहवाल प्रसिद्ध केला आहे. अपघातस्थळाजवळील एका गावातील सीसीटीव्ही फुटेजचा हवाला देत, एएआयबीने म्हटले आहे की, अपघात होण्यापूर्वी विमान उजवीकडे वळले, झाडांवर आदळले आणि नंतर जमिनीवर आले. यामुळे आग लागली, ज्यामुळे संपूर्ण कॉकपिट आणि केबिन आगीच्या भक्ष्यस्थानी पडले.

इतर महत्वाच्या बातम्या

• Video: स्ट्रेट ऑफ होर्मुझ रोखत इराणनं अवघ्या जगाचं नाकं दाबलं, पण त्याच होर्मुझच्या समुदात हाकेच्या अंतरावर तेल जहाज पेटत असतानाही इराणच्या निर्भिड चिमुकलीचा किनाऱ्यावर उंच माझा झोका!