கேரள மாநிலத்தைச் சேர்ந்தவர்களுக்கு படிக்கும்போதே நடிக்க வாய்ப்பு கிடைக்குது. அந்த வகையில் ராதா, அம்பிகாவைச் சொல்லலாம். ராதா, பாரதிராஜாவின் இயக்கத்தில் கார்த்திக் நடித்த அலைகள் ஓய்வதில்லை படத்தில் அறிமுகம் ஆனார். முதல் படமே மாபெரும் வெற்றி. ராதாவின் அக்கா அம்பிகாவும் நடிக்க ஆரம்பித்தார்.

அக்காவும், தங்கையும் சினிமாவில் வெற்றிகரமான ஹீரோயின்களாக வலம் வந்தனர். கார்த்திக், கமல், ரஜினி, விஜயகாந்த் என அப்போதைய முன்னணி ஹீரோக்களுடன் ஜோடி சேர்ந்தனர். தூங்காதே தம்பி தூங்காதே, ராஜாதி ராஜா, பாயும் புலி, மெல்லத் திறந்தது கதவு என ராதா பல படங்களில் வெற்றிகரமான ஹீரோயினாக ஜொலித்தார்.

சிவாஜி நடித்த முதல் மரியாதை படத்தில் ராதாவின் கேரக்டர் பேசும்படியாக இருந்தது. இந்தப் படத்தின் இயக்குனர் பாரதிராஜா. படத்தின் பாடல்களும் சூப்பர் ரகங்கள். படம் பட்டி தொட்டி எங்கும் பட்டையைக் கிளப்பியது. படத்தில் சிவாஜியுடன் ஜோடியாக ராதா நடித்தார்.

அந்தப் படத்தில் இவருக்கு வேறு ஒருவர் வாய்ஸ் கொடுத்ததால் தேசிய விருது மிஸ் ஆனதாம். 5 மொழிப்படங்களில் நடித்துள்ள இவருக்குக் கலைமாமணி விருதும் கிடைத்துள்ளது. 1991ல் டி.ராஜேந்தருடன் சாந்தி எனது சாந்தி படத்தில் நடித்தார். அதன்பிறகு சினிமாவில் நடிக்கவே இல்லை.

திருமணம் செய்து கொண்டு 3 குழந்தைகளுக்குத் தாயானார். டிவிகளில் ரியாலிட்டி ஷோக்களுக்கு ஜட்ஜாக வந்தார். 10 ஆண்டுகள் சினிமாவில் இருந்து 100 படங்கள் வரை நடித்து ரசிகர்களின் மனதில் நீங்கா இடம் பெற்றார் ராதா. இவரது இயற்பெயர் உதயசந்திரிகா என்பது குறிப்பிடத்தக்கது.