आयपीएल 2026 स्पर्धेत चेन्नई सुपर किंग्स आणि राजस्थान रॉयल्स हे संघ आमनेसामने आले. या सामन्यावर पूर्णपणे राजस्थान रॉयल्सचा वरचष्मा दिसला. नाणेफेकीचा कौल जिंकला आणि प्रथम गोलंदाजी स्वीकारली. हा निर्णय योग्यच ठरला असं म्हणावं लागेल. कारण या सामन्यात चेन्नई सुपर किंग्सच्या फलंदाजांना कुठेच डोकं वर काढता आलं नाही. चेन्नई सुपर किंग्सने 19.4 षटकात सर्व गडी गमवून 127 धावा केल्या. तसेच विजयासाठी 128 धावांचं आव्हान दिलं. या सामन्यात राजस्थान रॉयल्सच्या गोलंदाजीसमोर एकही फलंदाज तग धरू शकला नाही. या सामन्यात रवींद्र जडेजाची गोलंदाजी लक्षवेधी ठरली. कारण त्याने एकाच षटकात दोन विकेट काढल्या. यात शिवम दुबेची विकेट खास होती. कारण त्याने आल्या आल्याच रवींद्र जडेजाला षटकार मारला होता. त्यामुळे डोकेदुखी ठरेल असं वाटत होतं. पण दोन चेंडू निर्धाव टाकले आणि शेवटच्या चेंडूवर त्याची विकेट काढली. ही विकेट कशी काढली त्याबाबत सांगितलं.

रवींद्र जडेजा म्हणाला की, ‘मी शिवम दुबेला खूप काळापासून ओळखतो. मी नेटमध्ये त्याला गोलंदाजी केली आहे, त्यामुळे तो फिरकी गोलंदाजांना कसा सामोरा जातो हे मला माहीत आहे. मी त्यासाठी तयार होतो आणि ऑफ-स्टंपच्या बाहेर गोलंदाजी करण्याचा प्रयत्न केला. कारण मला माहीत होतं की तो माझ्याविरुद्ध मोठे फटके खेळण्याचा प्रयत्न करेल.मला वाटलं की खेळपट्टी थोडी चिकट होती आणि चेंडू वळत होता, त्यामुळे मला गोलंदाजी करायला खूप मजा आली. माझं काम फक्त योग्य ठिकाणी चेंडू टाकणं आणि बाकीचं काम खेळपट्टीवर सोपवणं हे होतं.’

रवींद्र जडेजाने या सामन्यात तीन षटकं टाकली आणि 18 धावा देत 2 विकेट काढल्या. यात सरफराज खान आणि शिवम दुबेची विकेट काढली. रवींद्र जडेजाला राजस्थान रॉयल्समध्ये परतल्यावर कसं वाटते असा प्रश्नही विचारला गेला. तेव्हा रवींद्र जडेजा म्हणाला की, मला वाटतं की गुलाबी रंग मला चांगला दिसतो. रवींद्र जडेजा मागची 12 वर्षे चेन्नई सुपर किंग्ससाठी खेळला आहे. या स्पर्धेपूर्वी राजस्थान रॉयल्स आणि चेन्नई सुपर किंग्स यांच्या ट्रेड झालं. यात संजू सॅमसन चेन्नई सुपर किंग्सकडे, तर रवींद्र जडेजा राजस्थान रॉयल्समध्ये आला. संजू सॅमसनने पहिल्या सामन्यात फक्त 6 धावा केल्या.