राजकीय वर्तुळातून मोठी बातमी समोर येत आहे. बॉक्सिंग फेडरेशनच्या अध्यक्षपदाचा वाद चांगलाच पेटला आहे. बॉस्किंग फेडरेशनच्या अध्यक्षपदावरून भाजप नेते प्रवीण दरेकर आणि शिवसेना शिंदे गटाचे नेते राहुल शेवाळे आमने-सामने आल्याचं पहायला मिळत आहे. यावरून प्रवीण दरेकर यांनी राहुल शेवाळे यांच्यावर जोरदार हल्लाबोल केला आहे. राहूल शेवाळेंना सांगितलं की हा विषय नीट पाहून घ्यावा. कुठलीही निवडणूक अशीच होत नाही. एखादी निवडणूक झाली की ती पुन्हा होत का? तर होत नाही. चोराच्या ऊलट्या बोंबा आहेत. आम्ही काही लपवून छपून निवडणूक लढलो नाही. नितीन गडकरी यांना सगळी माहिती देऊ, त्यांना चुकीची माहिती देण्यात आली आहे. ही सगळी नुरा कुस्ती सुरू आहे. राहूल शेवाळेंना राज्यसभा खासदारकी मिळाली नाही म्हणून ते बीएफआयच्या माध्यमातून दिल्ली गाठायचा प्रयत्न करत आहेत, असं यावेळी दरेकर यांनी म्हटलं आहे.
नेमकं काय म्हणाले दरेकर?
चोराच्या ऊलट्या बोंबा आहेत. आम्ही काही लपवून छपून निवडणूक लढलो नाही. ही सगळी नुरा कुस्ती सुरू आहे. राहूल शेवाळेंना राज्यसभा खासदारकी मिळाली नाही म्हणून ते बीएफआयच्या माध्यमातून दिल्ली गाठायचा प्रयत्न करत आहेत. शेवाळेंना बॉक्सिंगमधील काय समजतं ? शेवाळे यांच्या निवडीचा प्रकार कायदा गुंडाळून झाला. कोर्टाने निकाल दिल्यानंतर रडीचा डाव सुरू आहे. निवडणूक चॅरीटी कमिशनने घेतली. बीएफआय आणि जय कवळी यांच्यातील प्रकरण प्रलंबित आहे, असं यावेळी दरेकर यांनी म्हटलं आहे. दरम्यान दुसरीकडे राहुल शेवाळे यांनी देखील प्रवीण दरेकर यांच्या आरोपांना प्रत्युत्त दिलं आहे.
नेमकं काय म्हणाले राहुल शेवाळे?
प्रवीण दरेकरांनाच अभ्यास करण्याची गरज आहे. मला बॉक्सिंगमधलं काय कळतंय असं दरेकर म्हणाले, पण माझा मुलगा बॉक्सर आहे. दरेकरांनी माझ्या राजकीय भवितव्याची काळजी करू नये. मी राजकीय मार्गानेच दिल्लीला जाईन. दरेकरांना एवढंच सांगायचं आहे की त्यांची संघटना वेगळी आहे, आमची संघटना वेगळी आहे. त्यामुळे वाद होण्याचा प्रश्नच येत नाही. आम्ही सगळ्या कायदेशीर बाबींची पुर्तता केलीये, दुर्दैवाने त्यांनी जे विधान केलं ते योग्य नाही. आम्ही घटनात्मक बाजूने सक्षम आहोत असं शेवाळे यांनी म्हटलं आहे.
