गेल्या काही दिवसांपासून अमेरिका आणि इराणमध्ये सुरू असलेला टोकाचा संघर्ष तूर्तास थांबला आहे. अमेरिकेचे अध्यक्ष डोनाल्ड ट्रम्प यांनी इराणवर होणारे हल्ले दोन आठवड्यांसाठी थांबवण्याचा निर्णय घेतला आहे. पाकिस्तानने केलेल्या विनंतीनंतर या युद्धविरामाला अमेरिकेकडून सहमती दर्शवली आहे. आता दोन्ही देशांमधील तणाव कमी करण्यासाठी पाकिस्तानची राजधानी इस्लामाबाद येथे चर्चा होणार आहे. विशेष म्हणजे इराणने दिलेल्या १० अटी अमेरिकेने मान्य केल्याचा दावा इराणकडून केला जात आहे. आता या अटी नेमक्या कोणत्या त्याची माहिती समोर आली आहे.
इराणच्या सर्वोच्च राष्ट्रीय सुरक्षा परिषदेनुसार, इराणने अमेरिकेसमोर एक १०-कलमी योजना म्हणजेच काही अटी ठेवल्या होत्या. इराणच्या म्हणण्यानुसार, अमेरिकेने या अटी मान्य केल्या आहेत. त्यामुळे हा इराणचा मोठा विजय आहे. इराणच्या सरकारी मीडियानेही याचे जोरदार स्वागत केले आहे. या अटींमध्ये इराणचे वर्चस्व सिद्ध करणारे अनेक मुद्दे आहे.
युद्ध कायमचे थांबणार की पुन्हा भडकणार
दरम्यान अमेरिका आणि इराणमध्ये जरी युद्धविराम जाहीर झाला असला, तरी जमिनीवरची परिस्थिती पूर्णपणे शांत झालेली नाही. ट्रम्प यांच्या घोषणेनंतरही इराणने इस्रायलवर क्षेपणास्त्रे डागणे सुरूच ठेवले आहे. इस्रायलच्या हवाई संरक्षण यंत्रणेने हे हल्ले रोखले आहेत. इराणमध्ये सामान्य नागरिक अजूनही अणूप्रकल्पांच्या रक्षणासाठी रस्त्यावर उतरून अमेरिकेचा निषेध करत आहेत. तसेच इराणने संयुक्त अरब अमिरातीसारख्या (UAE) देशांमधील अमेरिकन तळांनाही लक्ष्य केल्याचे समोर आले आहे. आता येणाऱ्या दोन आठवड्यांत इस्लामाबाद होणाऱ्या चर्चेनंतर हे युद्ध कायमचे थांबणार की पुन्हा भडकणार, याबद्दलचा निर्णय होणार आहे. त्यामुळे सध्या तरी संपूर्ण जगाचे लक्ष या चर्चेकडे लागले आहे.
