Delhi Capital vs Gujarat Titans Marathi Cricket Updates: शुभमन गिलच्या येण्याने गुजरात टायटन्सच्या फलंदाजांना सूर गवसला... जॉस बटलर, वॉशिंग्टन सुंदर यांच्यासह कर्णधार गिलने दमदार फटकेबाजी करून दिल्ली कॅपिटल्ससमोर तगडे लक्ष्य उभे केले. या सामन्यापूर्वी सुंदर व बटलर यांच्या खराब कामगिरीची बरीच चर्चा रंगली होती, परंतु आज या दोघांनी टीकाकारांना आपल्या बॅटने उत्तर दिले.

सलग दोन विजय मिळवून दमदार कामगिरी करणाऱ्या दिल्लीसमोर आज एकही विजय न मिळवलेल्या गुजरातचे आव्हान आहे. DC कर्णधार अक्षर पटेलने नाणेफेक जिंकून प्रथम गोलंदाजीचा निर्णय घेतला आहे. GT च्या ताफ्यात कर्णधार शुभमन गिलचे पुनरागमन झाले आहे. कुमार कुशाग्रच्या जागी तो परतला आहे. साई सुदर्शनने मागील सामन्यातील फॉर्म कायम राखण्याचा प्रयत्न केला, परंतु तिसऱ्या षटकात मुकेश कुमारने त्याला ( १२) त्रिफळाचीत केले. पण, त्यानंतर आलेला जॉस बटलर आज वेगळ्याच तयारीने उतरलेला दिसला.

त्याने दिल्लीच्या गोलंदाजांचा चांगला समाचार घेताना चौकार-षटकारांचा पाऊस पाडला. मुकेस कुमारने टाकलेल्या पाचव्या षटकात त्याने २३ धावा कुटल्या. त्याआधीच्या षटकात अक्षर पटेलला त्याने दोन खणखणीत षटकार खेचले. या खेळीसह त्याने ट्वेंटी-२०त ६०० षटकारांचा टप्पा पूर्ण केला. ट्वेंटी-२० त सर्वाधिक षटकार खेचणाऱ्यांमध्ये ख्रिस गेल ( १०५६), किरॉन पोलार्ड ( ९८२), आंद्रे रसेल ( ७८४) व निकोलस पूरन ( ७१२) हे बटलरच्या ( ६००*) पुढे आहेत.