Passenger Death Mid Air: रविवारी एका आंतरराष्ट्रीय उड्डाणादरम्यान घडलेल्या धक्कादायक घटनेमुळे विमानप्रवासातील सुरक्षा आणि नियम पुन्हा चर्चेत आले आहेत. ब्रिटिश एअरवेजच्या फ्लाइटमध्ये एका महिला प्रवाशाचा अचानक मृत्यू झाल्यानंतर उर्वरित प्रवाशांना तब्बल 13 तासांहून अधिक वेळ तिच्या मृतदेहासह प्रवास करावा लागला.

ब्रिटिश एअरवेजची फ्लाइट BA32 ही Hong Kong येथून London कडे रवाना झाली होती. टेक-ऑफनंतर काही वेळातच 60 वर्षीय महिला प्रवाशाची प्रकृती बिघडली आणि तिचा मृत्यू झाला. विमान हवेत असताना आणि ठराविक प्रोटोकॉलमुळे फ्लाइट परत वळवण्यात आली नाही. परिणामी, विमानाने नियोजित मार्गानेच प्रवास करत लंडन हीथ्रो विमानतळ येथे लँडिंग केली.

मृतदेहासह 13 तासांचा प्रवास

या घटनेनंतर क्रू मेंबर्सनी महिलेचा मृतदेह व्यवस्थितपणे गुंडाळून विमानाच्या मागील भागात ठेवला. उर्वरित प्रवाशांना जवळपास 13.5 तासांचा प्रवास त्या मृतदेहासह करावा लागला. आंतरराष्ट्रीय विमान वाहतूक क्षेत्रात अशा घटनांसाठी स्पष्ट मार्गदर्शक तत्त्वे आहेत. International Air Transport Association (IATA) ने यासाठी काही नियम आखले आहेत.

काय आहेत ते नियम?

प्रवासादरम्यान एखाद्या प्रवाशाचा मृत्यू झाल्यास सर्वप्रथम कॅप्टनला माहिती दिली जाते. विमानात डॉक्टर किंवा वैद्यकीय तज्ज्ञ असल्यास त्यांची मदत घेतली जाते. अधिकृतपणे मृत घोषित करण्याचा अधिकार फक्त डॉक्टरलाच असतो. डॉक्टर नसल्यास पायलट जमिनीवरील मेडिकल एक्सपर्टशी संपर्क साधतो.

जागेच्या मर्यादेमुळे मृतदेह बहुतेक वेळा त्याच सीटवर ठेवला जातो. वॉशरूम किंवा गॅलरीमध्ये ठेवणे सुरक्षित नसल्याने तसे केले जात नाही. मृत व्यक्तीच्या डोळे बंद करून तिला ब्लँकेटने झाकले जाते. सीट बेल्ट लावून शरीर स्थिर ठेवले जाते. उपलब्ध असल्यास बॉडी बॅगचा वापर केला जातो. विमानात जागा असल्यास मृतदेह दुसऱ्या रिकाम्या जागी हलवला जाऊ शकतो.

इमरजन्सी लँडिंग आवश्यक असते का?

एखाद्या प्रवाशाचा मृत्यू झाल्यानंतर लगेच इमरजन्सी लँडिंग करणे बंधनकारक नसते. हा निर्णय कॅप्टन विमानाची स्थिती, अंतर आणि वैद्यकीय सल्ला लक्षात घेऊन घेतो. विमान लँड झाल्यानंतर सर्वप्रथम इतर प्रवाशांना सुरक्षितपणे उतरवले जाते. त्यानंतर संबंधित अधिकाऱ्यांच्या उपस्थितीत मृतदेह बाहेर काढला जातो.

या घटनेमुळे विमानप्रवासादरम्यान उद्भवणाऱ्या आपत्कालीन परिस्थितींचे गांभीर्य पुन्हा एकदा अधोरेखित झाले आहे. अशा प्रसंगी प्रवाशांच्या सुरक्षिततेसोबतच मृत व्यक्तीचा सन्मान राखणेही तितकेच महत्त्वाचे मानले जाते.