इराण आणि अमेरिका यांच्यातील शांततेची चर्चा निष्फळ ठरली आहे. दोन्ही देशांमध्ये कोणत्याही मुद्द्यांवर सहमती झालेली नाही. त्यामुळे दोन्ही देशांमधील तणाव आणखी वाढला आहे. यानंतर आता अमेरिकेचे राष्ट्राध्यक्ष डोनाल्ड ट्रम्प यांनी एक मोठा निर्णय घेतला आहे, ज्यामुळे संपूर्ण जगाची झोप उडाली आहे. अमेरिका लवकरच होर्मुझच्या सामुद्रधुनीतून ये-जा करणाऱ्या जहाजांची नाकेबंदी सुरू करणार असल्याची घोषणा ट्रम्प यांनी केली आहे. त्यामुळे या भागातील तणाव आणखी वाढला आहे. याबाबत सविस्तर माहिती जाणून घेऊयात.
डोनाल्ड ट्रम्प यांनी म्हटले की, ‘अमेरिकन नौदल तात्काळ प्रभावाने होर्मुजमध्ये प्रवेश करणाऱ्या किंवा तेथून बाहेर पडणाऱ्या सर्व जहाजांना थांबवण्याची प्रक्रिया सुरू करेल. मी माझ्या नौदलाला आंतरराष्ट्रीय जलक्षेत्रात इराणला टोल भरणाऱ्या प्रत्येक जहाजाचा शोध घेऊन त्यांना थांबवण्याचे निर्देश दिले आहेत.’ पुढे ट्रम्प यांनी आरोप केला की, इराणने या महत्त्वाच्या समुद्री मार्गाला खुला ठेवण्याच्या आपल्या आश्वासनांचे पालन केलेले नाही. समुद्रात बारूदी सुरंग असण्याच्या भीतीमुळे जहाजांची हालचाल आधीच प्रभावित झाली आहे. जर जहाजमालकांना वाटत असेल की कुठेही माइन असू शकते, तर ते धोका का पत्करतील? असा सवालही ट्रम्प यांनी उपस्थित केला आहे.
डोनाल्ड ट्रम्प यांनी पुढे बोलताना हेही सांगितले की, इस्लामाबादमध्ये इराणी अधिकाऱ्यांसोबत सुमारे 20 तास चाललेल्या चर्चेत अनेक मुद्द्यांवर सहमती झाली. सर्वात महत्त्वाचा मुद्दा असणाऱ्या इराणच्या अणु कार्यक्रमावर कोणताही करार होऊ शकला नाही. पुढे ट्रम्प यांनी म्हटले की, ‘इराण कधीही अण्वस्त्र मिळवू शकणार नाही. या विषयावर इराणचा दृष्टिकोन अजूनही कठोर आहे. जोपर्यंत इराण आपला अणु कार्यक्रम थांबवत नाही, तोपर्यंत त्याच्याशी चर्चा सुरू ठेवणे योग्य नाही.
ट्रम्प यांनी असेही सांगितले की, अमेरिका होर्मुजमध्ये असलेल्या बारूदी सुरंगांना हटवण्याची मोहीम राबवेल. या कामात गुंतलेल्या अमेरिकन जहाजांवर गोळीबार करणाऱ्या इराणी सैन्याला कठोर प्रत्युत्तर दिले जाईल. तसेच या भागात जहाजांकडून टोल वसूल करण्याच्या इराणच्या निर्णयाला ‘जबरदस्तीची वसुली’ असल्याचेही ट्रम्प यांनी म्हटले आहे.
