'इराणचा एका दिवसात निकाल लावू शकतो'; इस्लामबादमध्ये शांततेची चर्चा फिसकटल्याने ट्रम्प यांचा भयंकर इशारा
ET Marathi April 13, 2026 09:45 AM
अमेरिका आणि इराण दरम्यानच्या सुरू असलेल्या युद्धाला थांबवण्यासाठी दोन्ही देशांची बैठक पाकिस्तानच्या मध्यस्थीने इस्लामबाद येथे पार पडली. परंतू या बैठकीत कोणताही ठोस तोडगा न निघाल्याने २१ तास चाललेल्या या मॅरेथॉन चर्चेनंतर अमेरिकी उपराष्ट्राध्यक्ष जे.डी. वान्स मायदेशी परतले. मात्र, ही चर्चा फिसकटल्यानंतर अमेरिकेचे राष्ट्राध्यक्ष डोनाल्ड ट्रम्प यांनी अत्यंत आक्रमक पवित्रा घेत इराणला खुलं आव्हान दिलं आहे. "मी इराणचा एका दिवसात निकाल लावू शकतो," अशा शब्दांत ट्रम्प यांनी लष्करी कारवाईचे संकेत दिले आहेत.
काय म्हणाले डोनाल्ड ट्रम्प?फॉक्स न्यूजला दिलेल्या मुलाखतीत ट्रम्प यांनी इराणच्या नेतृत्वाला धारेवर धरले. ते म्हणाले, "इराणकडे वाटाघाटीसाठी कोणतेही सबळ कारण उरलेले नाही. ते पुन्हा चर्चेच्या टेबलावर येतील आणि आमच्या सर्व अटी मान्य करतील याची मला खात्री आहे." इराणच्या ऊर्जा क्षेत्रावर निशाणा साधताना ते पुढे म्हणाले की, "फक्त एका तासात मी इराणचे सर्व वीज प्रकल्प आणि ऊर्जा स्रोत उद्ध्वस्त करू शकतो. मला हे करायला आवडणार नाही, कारण यामुळे होणारे भरून काढायला त्यांना १० वर्षे लागतील. पण गरज पडल्यास आम्ही मागे हटणार नाही."
जे.डी. वान्स यांची भूमिका आणि 'अंतिम ऑफर'उपराष्ट्राध्यक्ष जे.डी. वान्स यांनी इस्लामबादहून निघताना स्पष्ट केले की, शांतता प्रस्थापित करण्यासाठी अमेरिकेने लवचिकता दाखवली होती, मात्र इराणने अण्वस्त्र निर्मिती न करण्याच्या अटीला नकार दिला. वान्स यांच्या मते, ही कोंडी इराणसाठी जास्त घातक ठरणार आहे. अमेरिकेने इराणसमोर आपली 'अंतिम आणि सर्वोत्तम' ऑफर ठेवली असून, आता चेंडू इराणच्या कोर्टात आहे.
इराणचा प्रतिवाददुसरीकडे, इराणच्या सरकारी प्रसारमाध्यमांनी या अपयशाचे खापर अमेरिकेच्या 'अवाजवी मागण्यांवर' फोडले आहे. अण्वस्त्र हक्क आणि 'स्ट्रेट ऑफ हॉर्मुझ' (Strait of Hormuz) यांसारख्या मुद्द्यांवर अमेरिका दबाव टाकत असल्याचा आरोप इराणने केला आहे
भारतीय अर्थव्यवस्थेसमोर आव्हानया दोन देशांमधील वाढत्या तणावामुळे जागतिक बाजारात कच्च्या तेलाच्या किमती भडकू शकतात. जर ट्रम्प यांनी म्हटल्याप्रमाणे लष्करी कारवाई झाली, तर जागतिक शांततेला धोका निर्माण होऊन महागाईत मोठी वाढ होऊ शकते. हे विशेषतः महत्त्वाचे आहे कारण इराणच्या मार्गातून होणारा व्यापार आणि इंधन पुरवठा प्रभावित होऊ शकतो. सध्या जागतिक बाजारात कच्च्या तेलाच्या किंमती ९५ डॉलर प्रति बॅरल असून त्या भारतीय अर्थव्यवस्थेसाठी नकारात्मक संकेत आहेत. तेलाच्या किंमती चढ्या राहिल्याने शेअर बाजारावरही त्याचा नकारात्मक परिणाम होत राहील. त्यामुळे मध्यपूर्वेतील ही कोंडी लवकरात लवकर सुटने गरजेचे आहे.
