सनरायजर्स हैदराबादच्या प्रफुल हिंगे आणि साकिब हुसेन या युवा आणि वेगवान गोलंदाजांनी राजस्थान रॉयल्सला सलग आणि एकूण पाचवा सामना जिंकण्यापासून यशस्वीरित्या रोखलं आहे. सनरायजर्स हैदराबादने राजस्थानसमोर आयपीएल स्पर्धेच्या19 व्या मोसमातील (IPL 2026) 21 व्या सामन्यात 217 धावांचं आव्हान ठेवलं होतं. मात्र प्रफुल आणि साकिब जोडीने राजस्थानचा डाव 19 ओव्हरमध्ये 159 रन्सवर गुंडाळला. प्रफुल आणि साकिब या दोघांनी प्रत्येकी 4-4 विकेट्स घेत हैदराबादच्या विजयात प्रमुख भूमिका बजावली. हैदराबादने यासह राजस्थानला सलग पाचवा सामना जिंकण्यापासून रोखत आपला दुसरा विजय मिळवला. हैदराबादचा राजस्थान विरुद्धचा हा एकूण पाचवा विजय ठरला. तर राजस्थानला या 19 व्या मोसमात पहिल्या पराभवाचा सामना करावा लागला.