मुंबई : 1990 च्या दशकात भारतामध्ये जपानच्या शार्प टीव्हीचा एक वेगळा दबदबा होता. जपानी गुणवत्तेच्या चांगल्या पिक्चर क्वालिटीमुळे शार्प टीव्हीला भरपूर मागणी होती. पण नंतरच्या स्पर्धेच्या काळात ही कंपनी मागे पडली. जपानची ही शार्प इंडिया कंपनी आता मराठी माणसाने ताब्यात घेतलीय. पुण्याच्या चंद्रकांत गायकवाड यांच्या स्मार्ट सर्व्हिसेस कंपनीने काल जपानमध्ये शार्प कंपनीसोबत शेअर ॲग्रीमेंट करार केला आणि 75 टक्के शेअर्स विकत घेतले. ज्यामुळे आता पुणेस्थित असलेल्या या जपानच्या कंपनीवर मराठी माणसाची मालकी असणार आहे. सध्या या कंपनीत 80 कर्मचारी काम करत असून या कर्मचाऱ्यांची जबाबदारीही स्मार्ट सर्व्हिसेस कंपनीने घेतली आहे. स्मार्ट सर्व्हिसेस कंपनी ही हाऊस किपिंग, मॅन पॅावर सप्लायसह विविध क्षेत्रात कार्यरत आहे. या कंपनीची वार्षिक उलाढाल दीड हजार कोटी रुपयांची आहे.
शार्प कंपनीवर ताबा मिळवल्याने स्मार्ट सर्व्हिसेस कंपनीचा विस्तार वाढला असून येत्या काळात सेमीकंडक्टर निर्माण करण्याच्या क्षेत्रातही कंपनी पाऊल टाकणार आहे. तसंच शार्प कंपनीच्या इलेक्ट्रॉनिक वस्तू पुन्हा एकदा प्रत्येक भारतीयांपर्यंत नेण्याचा प्रयत्न कंपनीचा असणार आहे.
फॅसिलिटी मॅनेजमेंट आणि मॅन पॅावर सप्लाय क्षेत्रातील एक विश्वासार्ह नाव. दीड हजार कोटी रूपयांचा टर्नओव्हर असलेल्या स्मार्ट सर्व्हिसेस कंपनीचे ते सर्वेसर्वा….महाराष्ट्र सरकारच्या विविध विभागांमध्ये सुमारे 40 हजारांहून अधिक कंत्राटी कर्मचारी त्यांच्या याच कंपनीमार्फत सेवा बजावतात. केवळ महाराष्ट्रापुरते मर्यादीत न राहता राजस्थान, मध्य प्रदेश,उत्तर प्रदेश, तेलंगणा, दिल्लीसह इतर 10 राज्यांतही त्यांच्या कंपनीचा विस्तार झाला आहे. त्यांची ही सध्याची प्रगती नजरेत भरणारी असली तरी इथपर्यंतचा त्यांचा प्रवास मात्र संघर्षाने भरलेला आहे.
पुण्यात एका सामान्य कुटुंबातील त्यांचा जन्म …वडिल एका शाळेत शिपाई, आई गृहिणी आणि हे चार भावंडे…घरची आर्थिक स्थिती तशी बेताची असल्याने दहावीनंतरचे शिक्षण त्यांना पार्ट टाईम काम करतच पूर्ण करावे लागले. ॲाफिस बॅाय, असिस्टंट अशी पडेल ती कामं तेव्हा करावी लागली. परंतु शिकण्याची जिद्द असल्याने त्यांनी कायद्याची पदवी पूर्ण करत 2003 ला स्वतःची प्रॅक्टीस सुरू केली आणि 2005 ला कन्सल्टन्सी फर्म सुरू केले.
एका मराठी उद्योजकाकडून प्रेरणा घेत 2009 मध्ये त्यांनी ब्रिस्क कंपनी सुरू करत फॅसिलिटी मॅनेजमेंट क्षेत्रात पाऊल टाकले.विविध महापालिका आणि राज्य सरकारच्या विविध विभागांत कामे सुरू असली तरी 2021-22 पर्यंत कंपनीची वार्षिक उलाढाल शंभर सव्वाशे कोटीपर्यंतच होती. यानंतर मात्र कंपनीने फॅसिलिटी मॅनेजमेंट बरोबरच मॅन पॅावर सप्लाय, मेडिकल इक्विपमेंट सप्लाय सारख्या क्षेत्रात काम करत व्यवसायाच्या कक्षा रूंदावल्या. दरम्यानच्या काळात ब्रिस्क कंपनीचे नामांतर स्मार्ट सर्व्हिसेस असं करण्यात आले.चंद्रकांत गायकवाड यांनी बॅंकिंग क्षेत्रातही पाऊल टाकले असून जयोस्तुते कॅपिटल ही एनबीएफसी त्यांनी सुरू केलीय.
