बॉलिवूड म्हणजे झगमगती दुनिया आहे. पण इथे जो टिकतो त्यालाच मान मिळतो. जो चर्चेत असतो त्यालाच विचारलं जातं. अनेक नवीन कलाकार दर वर्षी बॉलिवूडमध्ये येत असतात. कुणाला लोकप्रियता मिळते तर कुणाला मिळत नाही. मात्र इथे असे अनेक ज्येष्ठ कलाकार आहेत ज्यांनी आपलं आयुष्य अभिनयासाठी वाहून घेतलं. मात्र या कलाकारांची बॉलिवूडमध्ये किंमत केली जात नाही. अशाच एका ज्येष्ठ कलाकाराचा व्हिडिओ सोशल मीडियावर व्हायरल होतोय. जो पाहून नेटकऱ्यांमध्ये संतापाची लाट उसळली आहे.

लवकरच 'गिन्नी वेड्स सनी २' हा चित्रपट प्रेक्षकांच्या भेटीला येणार आहे. मात्र या चित्रपटाच्या ट्रेलर लॉन्च दरम्यान ज्येष्ठ अभिनेते सुधीर पांडे यांना जशी वागणूक दिली गेली ती पाहून नेटकरी संतापले आहेत. ७२ वर्षीय दिग्गज कलाकाराचा झालेला हा अपमान पाहून नेटकऱ्यांनी चित्रपटाच्या टीमवर जोरदार टीका केली आहे. नुकताच अविनाश तिवारी आणि मेधा शंकर यांच्या 'गिन्नी वेड्स सनी २' या चित्रपटाचा ट्रेलर लाँच सोहळा पार पडला. या कार्यक्रमात सुधीर पांडे देखील उपस्थित होते. मात्र, सोशल मीडियावर व्हायरल झालेल्या एका व्हिडिओमध्ये असे दिसत आहे की, स्टेजवर मुख्य कलाकार अविनाश आणि मेधा एकमेकांशी बोलण्यात व्यस्त आहेत, तर तिथेच उभे असलेल्या सुधीर पांडे यांच्याकडे कोणाचेही लक्ष नाही.