लोक घरात सीसीटीव्ही का लावतात? तर तो घराच्या सुरक्षेसाठी लावतात. तुम्ही जेव्हा कुठे बाहेर गेला आहात, घरी नाही आहात, अशावेळी तुमच्या घरात किंवा परिसरात काही दुर्घटना घडली, चोरी झाली तर आपण तिथे लावलेल्या सीसीटीव्ही कॅमेऱ्याच्या मदतीने सहज आरोपीला पकडू किंवा तिथे नेमकं काय काय घडलं? हे आपल्याला पहाता यावं या विचारने अनेकजण आपल्या घरात सीसीटीव्ही कॅमेरे बसवतात. मात्र याच सीसीटीव्ही कॅमेऱ्यांमुळे तुमच्या आयुष्यात भूकंप देखील येऊ शकतो? हे तुम्हाला माहिती आहे का? असाच एक प्रकार दिल्ली पोलिसांनी समोर आणला आहे, ही बातमी समोर येताच मोठी खळबळ उडाली आहे.

या प्रकरणात आतापर्यंत पोलिसांनी आठ लोकांना अटक केली आहे. या आठ लोकांच्या चौकशीमधून धक्कादायक माहिती समोर आली आहे. ज्या आरोपींना अटक करण्यात आलं आहे, त्यांचं पाकिस्तान कनेक्शन समोर आलं आहे. पोलीस चौकशीमध्ये अशी माहिती समोर आली आहे की, या लोकांनी पाकिस्तानमध्ये बसलेल्या आपल्या साथीदारांच्या सांगण्यावरून अनेक ठिकाणी सोलर पॅनलवाले सीसीटीव्ही कॅमेरे लावले होते, त्यानंतर ते या कॅमेऱ्याचं फीड थेट पाकिस्तानात पाठवत होते. हे कॅमेरे अनेक सेंसेटीव्ह आणि सुरक्षिततेच्या दृष्टीकोणातून महत्त्वाच्या असलेल्या ठिकाणी लावण्यात आले होते. चौकशीतून समोर आलेल्या धक्कादायक माहितीमुळे आता पोलिसांची देखील झोप उडाली आहे.

आणखी एका दुसऱ्या प्रकरणात अशीच एक धक्कादायक माहिती समोर आली आहे, हे प्रकरण 2025 मधलं आहे. एका युट्यूब चॅनलवर राजकोटमधील एका हॉस्पिटलमधील व्हिडीओ व्हायरल झाले होते, या व्हिडीओमध्ये गर्भवती महिलांवर त्या हॉस्पिटलमध्ये सुरू असलेले वैद्यकीय उपाचार दाखवण्यात येत होते. एवढंच नाही तर त्यांना इंजेक्शन देण्याची क्रिया देखील दाखवण्यात आली होती, या प्रकरणाची पोलिसांनी गंभीर दखल घेतली, जेव्हा सत्य परिस्थिती समोर आली तेव्हा पोलिसांच्या पायाखालची वाळूच सरकली, या हॉस्पिटलमधील सर्व कॅमेरे हॅक करण्यात आल्याची माहिती समोर आली, या घटनेनं मोठी खळबळ उडाली आहे.