राष्ट्रवादी काँग्रेस (शरदचंद्र पवार गट) पक्षाचे अध्यक्ष आणि महाराष्ट्राचे ज्येष्ठ नेते शरद पवार यांची प्रकृती पुन्हा एकदा बिघडल्यामुळे त्यांना मुंबईतील ब्रीच कँडी रुग्णालयात दाखल करण्यात आले आहे. त्यांची कन्या आणि खासदार सुप्रिया सुळे यांनी याबाबत माहिती दिली आहे. रुग्णालयात दाखल असल्यामुळे शरद पवार आज बारामती दौऱ्यावर जाऊ शकणार नाहीत.

नेमकं काय झालं?

शरद पवार दिल्लीहून दोन दिवसांपूर्वी आले आणि त्यानंतर त्यांना ब्रीच कँडी रुग्णालयात अॅडमिट करण्यात आले. प्रकृती बिघडल्यामुळे उपचारासाठी त्यांना अॅडमिट करण्यात आले. सोमवारी डिस्चार्ज मिळणार होता. मात्र डॉक्टरांनी आराम करण्याचा सल्ला दिल्यामुळे त्यांना हॉस्पिटलमध्येच ठेवण्यात आले आहे.

सुप्रिया सुळे यांनी प्रसारमाध्यमांशी बोलताना सांगितले की, शरद पवार यांना नियमित तपासणी आणि काही महत्त्वाच्या वैद्यकीय चाचण्यांसाठी रुग्णालयात दाखल करण्यात आले आहे. सध्या त्यांच्या विविध चाचण्या सुरू असून, अहवाल आल्यानंतरच त्यांच्या प्रकृतीबाबत स्पष्ट माहिती मिळू शकेल.

प्रकृती स्थिर, खबरदारी म्हणून दाखल

सूत्रांनी दिलेल्या माहितीनुसार, शरद पवार यांची प्रकृती सध्या स्थिर आहे. मात्र, त्यांचे वय आणि अलीकडची प्रकृती पाहता खबरदारीचा उपाय म्हणून त्यांना रुग्णालयात दाखल करण्यात आले आहे. डॉक्टर त्यांच्या सर्व रिपोर्ट्सची वाट पाहत आहेत, त्यानंतर पुढील उपचार किंवा डिस्चार्जबाबत निर्णय घेतला जाईल.

पूर्वीही झाले होते रुग्णालयात दाखल

गेल्या महिन्यातही प्रकृती बिघडल्यानंतर शरद पवार यांना पुण्यातील एका रुग्णालयात दाखल करण्यात आले होते. काही दिवसांच्या उपचारानंतर त्यांना घरी सोडण्यात आले होते, पण आता पुन्हा एकदा त्यांना रुग्णालयात भरती व्हावे लागले आहे.

बारामतीच्या महत्त्वाच्या सभेला राहणार अनुपस्थित

रुग्णालयात दाखल असल्यामुळे शरद पवार त्यांच्या नियोजित कार्यक्रमांना उपस्थित राहू शकणार नाहीत. बारामतीमध्ये होणारी प्रचाराची सांगता सभा अत्यंत महत्त्वाची मानली जात होती, परंतु प्रकृतीच्या कारणास्तव ते यात सहभागी होणार नाहीत.