Vidhan Parishad Election Eknath Shinde: विधान परिषद निवडणूक आता अगदी जवळ आली आहे. महायुतीत भाजपने सहा उमेदवार जाहीर करून आघाडी घेतली. तर राष्ट्रवादी काँग्रेसची कालपासून मॅरेथॉन बैठक सुरू आहे. 70-75 उमेदवारांपैकी कुणाचा नंबर लागणार हे आज संध्याकाळी समोर येईल. तर दुसरीकडे एकनाथ शिंदे यांच्या मनात काय सुरू आहे हे समोर आलेले नाही. बच्चू कडू, नीलम गोऱ्हे की शिंदे धक्कातंत्राचा वापर करणार याची चर्चा रंगली आहे. बच्चू कडू यांनी आज वेगळी भूमिका मांडली. त्यामुळे शिंदे कोणता मास्टरस्ट्रोक खेळतात याकडे सर्वांचे लक्ष लागले आहे.

बच्चू कडू, नीलम गोऱ्हे की अजून कोणी?

महाविकास आघाडीकडून अजून उद्धव ठाकरे यांनी उमेदवारी जाहीर केली नाही. जर उद्धव ठाकरे नसतील तर मग शिंदे सेना दोन उमेदवार पुढे करू शकते. जर उद्धव ठाकरे यांनी उमेदवारी जाहीर केली. तर कदाचित एका जागेसाठी क्रॉस वोटिंगचा प्रयोग होऊ शकतो. बच्चू कडू यांचा प्रयोग अजून फसलेला नाही. पण अटी आणि शर्तीविना कडू मैदानात उतरू शकतात. त्यांचा पत्ता कट झाल्यास नीलम गोऱ्हे अथवा इतर कुणाला लॉटरी लागणार हे अद्याप समोर आलेले नाही. राज्यसभेवेळी अनेक दिग्गज मैदानात असताना एकनाथ शिंदे यांनी धक्कातंत्राचा वापर केला. सोलापूर येथील ज्योती वाघमारे यांना राज्यसभेवर पाठवले. त्यामुळे यावेळी शिंदे कोणता मास्टरस्ट्रोक मारतात याची चर्चा रंगली आहे.

उद्यापर्यंत चित्र स्पष्ट

विधान परिषदेचे 9 आमदार येत्या 13 मे रोजी निवृत्त होत आहे. त्यांच्या रिक्त जागेसाठी 12 मे रोजी निवडणूक होत आहे. विधान परिषद निवडणुकीसाठी उद्यापर्यंत उमेदवारी अर्ज दाखल करण्याची अखेरची तारीख आहे. त्यामुळे आज संध्याकाळी अथवा उद्या सकाळी शिंदे सेनेला उमेदवार जाहीर करणे आवश्यक आहे. विधान परिषदेत निवडून येण्यासाठी एका उमेदवाराला 28 मतांचा कोटा आवश्यक आहे. विधानसभेत शिंदे गटाकडे 57 जागा आहेत. त्यामुळे महाविकास आघाडीच्या अधिक मताच्या बेगमीवर एक अजून जागा निवडून आणण्याची खेळी शिंदे सेना करणार असल्याचे समोर येत आहे. बच्चू कडू, नीलम गोऱ्हे की अजून तिसराच उमेदवार याविषयी चर्चा रंगली आहे.