தமிழ் சினிமாவில் முன்னணி இசையமைப்பாளரான இளையராஜா தனது யூட்யூப் பக்கத்தில் விஜய் பட பாடல் ஒன்றை திடீரென வெளியிட்டுள்ளார். இதன்மூலம் அவர் விஜய்க்கு ஆதரவு தருகிறாரா என்ற எதிர்பார்ப்பு எழுந்துள்ளது.
2026 தமிழக சட்டமன்ற தேர்தல் கடந்த ஏப்ரல் 23ம் தேதி நடைபெற்றது. திமுக, அதிமுக, நாம் தமிழர், தமிழக வெற்றிக் கழகம் என 4 முனை போட்டி நிலவும் நிலையில் பதிவான வாக்குகள் அனைத்தும் மே 4ம் தேதி எண்ணப்படுகிறது. இப்படியான நிலையில் இந்த சட்டமன்ற தேர்தலில் யார் ஜெயிப்பார் என்பது கேள்விக்குறியாக உள்ளது. வழக்கமாக திமுக அல்லது அதிமுக ஜெயிக்கும் என்பதை எளிதாக கணிக்கும் அரசியல் களம் விஜயின் தமிழக வெற்றிக் கழகம் வருகையால் திசை மாறியுள்ளது.
இந்த நிலையில் ஏப்ரல் 29ம் தேதி தேர்தலுக்கு பிந்தைய கருத்துக் கணிப்பு வந்தது. இதில் பெரும்பாலான கருத்துக்கணிப்புகளில் மீண்டும் திமுக தான் ஆட்சிக்கு வரும் என தெரிவிக்கப்பட்டுள்ளது. இரண்டு கருத்து கணிப்புகள் அதிமுகவுக்கும், ஒரு கருத்துக்கணிப்பு தவெகவுக்கும் ஆதரவாகவும் உள்ளது. கருத்துக்கணிப்பு எல்லாம் மாயை வேலை என அதிமுக கடுமையாக விமர்சித்துள்ளது. கண்டிப்பாக நாங்கள் தான் ஜெயிப்போம் என திமுக, அதிமுக, தமிழக வெற்றிக் கழகம் உறுதியாக நம்பிக்கை தெரிவித்துள்ளது.
இதனிடையே தேர்தலில் ஜெயித்து விட்டால் என்னென்ன செய்ய வேண்டும் என்பது தொடர்பான ஆலோசனையில் அனைத்து கட்சிகளும் ஈடுபட்டு வருகின்றன. அதேசமயம் வாக்கு எண்ணிக்கையின்போது கவனமுடன் இருக்க வேண்டும் எனவும் அறிவுறுத்தப்பட்டுள்ளது. தமிழக வெற்றிக் கழகம் இந்த தேர்தலில் அசைக்க முடியாத தாக்கத்தை ஏற்படுத்தும் என அக்கட்சி தொண்டர்கள் மட்டுமின்றி ஒட்டுமொத்த தமிழ்நாடு மிகப்பெரிய எதிர்பார்ப்புடன் காத்திருக்கிறது.
விஜய்க்கு சினிமாத்துறையில் இருந்து ஆதரவுக்குரல் வெளிப்படையாகவும், மறைமுகமாகவும் கொடுக்கப்படுகிறது. சின்னத்திரை, பெரியதிரை பல பிரபலங்கள் அவருக்காக வீதிதோறும் பரப்பு மேற்கொண்டனர். இந்த நிலையில் மே 4ம் தேதியை நோக்கி அனைவரது பார்வையும் திரும்பியுள்ளது.
இந்த நிலையில் இளையராஜா தனது யூட்யூப் பக்கத்தில் விஜய் நடித்த படத்தின் பாடல் ஒன்றை வெளியிட்டுள்ளார். 1988ம் ஆண்டு எஸ்.ஏ.சந்திரசேகர் இயக்கத்தில் நிழல்கள் ரவி, வாணி விஸ்வநாத், ராதிகா நடித்த படம் ‘இது எங்கள் நீதி’. இந்த படத்திற்கு இளையராஜா இசையமைத்தார். இதில் குழந்தை நட்சத்திரமாக விஜய் நடித்திருப்பார். அப்படத்தில் இடம் பெற்ற சின்னதம்பி உன்னை நம்பி நாடு காத்திருக்கு என தொடங்கும் வரிகள் மூலம் விஜய்க்கு மறைமுகமாக இளையராஜா ஆதரவு தெரிவிக்கிறாரா என்ற கேள்வியெழுந்துள்ளது. எனினும் இளையராஜா பதிவுக்கு தவெக தொண்டர்கள் வரவேற்பளித்துள்ளனர்.
