सरकारी कंपन्या भरणार गुंतवणूकदारांचे खिसे; SBI, Coal India सह 12 कंपन्या देणार घसघशीत लाभांश
ET Marathi May 11, 2026 10:45 PM
मुंबई : सरकारी मालकीच्या कंपन्यांचे (PSU) शेअर्स असणाऱ्या गुंतवणूकदारांची मोठी कमाई होणार आहे. कोल इंडिया, माझगाव डॉक, आरईसी, इंडियन बँक आणि जीआरएसई आदी अनेक कंपन्यांनी दमदार तिमाही निकाल आणि भरीव लाभांश जाहीर केले. त्यामुळे गुंतवणूकदारांना अतिरिक्त फायदा मिळणार आहे.
सार्वजनिक क्षेत्रातील कंपन्यांमध्ये सरकारची मोठी हिस्सेदारी असते. त्यामुळे या कंपन्या त्यांच्या नफ्याचा मोठा हिस्सा लाभांशाच्या स्वरूपात गुंतवणूकदारांना वितरित करतात. यामुळेच दीर्घकालीन गुंतवणुकीसाठी सार्वजनिक क्षेत्रातील कंपन्यांच्या शेअर्सना जास्त पसंती दिली जाते. कोणत्या सरकारी कंपनीने किती लाभांस जाहीर केला ते जाणून घेऊया.
एसबीआय
एसबीआयने प्रति शेअर १७.३५ रुपये लाभांश जाहीर केला आहे. लाभांशासाठी रेकॉर्ड तारीख १६ मे २०२६ आहे. या लाभांशाचे वितरण ४ जून २०२६ रोजी केले जाईल.
चेन्नई पेट्रोलियम कॉर्पोरेशन
चेन्नई पेट्रोलियमचा नफा 1,659% वाढून 3,062 कोटी रुपये झाला. कंपनीने मार्च तिमाहीत प्रति शेअर 54 रुपये लाभांश जाहीर केला. संपूर्ण वर्षाचा एकूण लाभांश प्रति शेअर 62 रुपये होता.
कोल इंडिया
कोल इंडियाने मार्च तिमाहीसाठी प्रति शेअर ५.२५ रुपये लाभांश जाहीर केला. संपूर्ण आर्थिक वर्ष २०२६ साठी कंपनीने प्रति शेअर एकूण २६.७५ रुपये लाभांश दिला. तिमाहीत कंपनीचा नफा ११% वाढून १०,८३९ कोटी रुपये झाला. तसेच उत्पन्नातही वाढ झाली. .
इंडियन बँक
इंडियन बँकेचा मार्च तिमाहीतील नफा ५% वाढून ३,१०३ कोटी रुपये झाला आहे. बँकेने प्रति शेअर १८.२५ रुपयांचा अंतिम लाभांश जाहीर केला आहे. या लाभांशासाठी रेकॉर्ड तारीख १० जून, २०२६ आहे.
माझगाव डॉक शिपबिल्डर्स
माझगाव डॉकने या तिमाहीत उत्कृष्ट कामगिरी केली आहे. कंपनीचा नफा १०९% वाढून ६७९ कोटी झाला आहे. कंपनीने प्रति शेअर ४.६२ रुपयेअंतिम लाभांश जाहीर केला आहे. संपूर्ण आर्थिक वर्ष २०२६ साठी एकूण लाभांश प्रति शेअर १८.१२ रुपये होता.
युनियन बँक ऑफ इंडिया
युनियन बँक ऑफ इंडियानेही आपल्या भागधारकांना खूश केले आहे. बँकेने प्रती शेअर ५ रुपये लाभांश जाहीर केला आहे.
गार्डन रीच शिपबिल्डर्स अँड इंजिनिअर्स
कंपनीने नफ्यात २४% वाढ नोंदवून तो ३०३ कोटी रुपये झाल्याचे सांगितले. कंपनीने प्रति शेअर 6.70 रुपयांचा अंतिम लाभांश जाहीर केला. गुंतवणूकदारांना संपूर्ण वर्षासाठी प्रति शेअर 19.60 रुपये लाभांश मिळाला.
आरईसी लिमिटेड
आरईसी लिमिटेडने चौथ्या तिमाहीत प्रति शेअर १.५५ रुपये लाभांश जाहीर केला. कंपनीने संपूर्ण वर्षासाठी प्रति शेअर एकूण १८.५५ रुपयांचा लाभांश दिल आहे. या तिमाहीत कंपनीचा नफा घटला असला तरी कंपनीने लाभांश जाहीर केला.
बीएचईएल
बीएचईएलने १.४ रुपये शेअर लाभांश जाहीर केला. मजबूत लाभांश धोरणे आणि सरकारी पाठिंब्यामुळे सार्वजनिक क्षेत्रातील कंपन्यांमध्ये गुंतवणूकदारांची रुची सातत्याने वाढत आहे.
पंजाब नॅशनल बँक
पीएनबीने मार्च तिमाही निकालांसह आपल्या भागधारकांसाठी प्रति शेअर ३ रुपये लाभांश देण्याची घोषणा केली आहे.
नाल्को
नॅशनल ॲल्युमिनियम कंपनीची तिमाही कामगिरी थोडी कमकुवत होती. परंतु तरीही कंपनीने गुंतवणूकदारांना प्रति शेअर 2 रुपये लाभांश देण्याचा निर्णय घेतला. संपूर्ण आर्थिक वर्ष 2026 साठी कंपनीने प्रति शेअर एकूण 10.5 रुपयांचा लाभांश दिला.
बँक ऑफ महाराष्ट्र
बँकेने प्रती शेअर २.२ रुपये लाभांश जाहीर केला आहे. याआधी बँक ऑफ महाराष्ट्रने प्रत्येक शेअरवर १.२ रुपये लाभांश वाटला होता.
