उत्तर प्रदेशातील कानपूरमधून एक अत्यंत संवेदनशील आणि धक्कादायक घटना समोर आली आहे. इंडो-तिबेटियन बॉर्डर पोलिस (आयटीबीपी) दलातील एका जवानाने आपल्या आईचा कापलेला हात थर्मोकोलच्या खोक्यात पॅक करून थेट पोलीस आयुक्तांच्या कार्यालयात आणला.

एका खासगी रुग्णालयाच्या कथित निष्काळजीपणामुळे आणि अयोग्य उपचारामुळे आपल्या आईचा हात कापावा लागला, असा आरोप त्या जवानाने केला आहे. तक्रार करूनही पोलिसांनी एफआयआर दाखल केला नाही, असा आरोपही त्याने केला आहे. या घटनेमुळे आरोग्य व्यवस्था, पोलिसांची कारवाई आणि रुग्णांच्या सुरक्षेबद्दल गंभीर प्रश्न निर्माण झाले आहेत

जवानाचं म्हणणं काय?

आयटीबीपी जवान विकास सिंग यांच्या म्हणण्यानुसार, श्वास घेण्यास त्रास होऊ लागल्याने त्यांच्या आईला १३ मे रोजी कानपूरमधील जीटी रोडवरील कृष्णा रुग्णालयात दाखल करण्यात आले होते . असा आरोप आहे की, उपचारादरम्यान डॉक्टरांनी चुकीचे इंजेक्शन दिल्याने त्यांच्या उजव्या हाताला गंभीर संसर्ग झाला. कुटुंबीयांच्या म्हणण्यानुसार, तिची प्रकृती खालावल्यानंतर तिला पारस रुग्णालयात दाखल करण्यात आले, जिथे डॉक्टरांनी शरीरात संसर्ग पसरू नये म्हणून तिचा हात कापावा लागेल असे सांगितले.