Rohit Shetty Firing Case : बॉलिवूडचा प्रसिद्ध निर्माता आणि दिग्दर्शत रोहित शेट्टी याच्या घरावर गोळीबार झाल्यानंतर बॉलिवूडमध्ये दहशतीचं वातावरण निर्माण झालं होतं. सध्या या प्रकरणी अधिक चौकशू सुरु असून, नुकताच एक खळबळजनक माहिती समोर आली आहे. जेव्हा रोहित शेट्टी याच्या घरावर गोळीबार झाला तेव्हा अनमोल बिश्नोई याचं संपूर्ण लक्ष घडत असलेल्या घटनेकडे होतं. रोहित शेट्टीच्या घरावर झालेल्या गोळीबाराप्रकरणी दोषारोपपत्र दाखल करण्यात आलं आहे.

गँगस्टर अनमोल बिश्नोईने रोहित शेट्टीच्या घरावर झालेल्या गोळीबाराच्या संपूर्ण कारवाईवर व्हिडिओ कॉलद्वारे लक्ष ठेवलं असल्याची माहिती समोर येत आहे. जोपर्यंत हल्ला पूर्ण होत नाही, तोपर्यंत तो गोळीबार करणाऱ्यांच्या म्हणजेच शूटर्सच्या संपर्कात होता.

संबंधित माहिती गेल्या महिन्यात विशेष ‘मकोका’ (MCOCA) न्यायालयात दाखल करण्यात आलेल्या दोषारोपपत्रात नमूद करण्यात आले आहे. तपास अधिकाऱ्यांच्या माहिती प्रमाणे हा गोळीबार एका पूर्व-नियोजित मोहिमेचा भाग होता. ज्याचा उद्देश दहशत निर्माण करणे आणि टोळीचे वर्चस्व प्रस्थापित करणे हा होता.

विशेष ‘मकोका’ न्यायालयात दाखल करण्यात आलेल्या 1 हजार 624 पानांच्या दोषारोपपत्रात असं म्हटलं आहे की, या घटनेदरम्यान बिश्नोई हा मुख्य गोळीबाराला शूटरला कथितरित्या सूचना देत होता. ही मोहीम पूर्ण करण्यासाठी मुख्य शूटरला प्रोत्साहित करत होता.

दोषारोपपत्रात असा दावा करण्यात आला आहे की, मुख्य आरोपी प्रदीप कुमार याने प्रत्यक्ष गोळीबार होण्याच्या सुमारे 10 दिवस आधीच, शेट्टी यांच्या निवासस्थानाला लक्ष्य करण्याचा एक प्रयत्न कथितरित्या केला होता. सध्या पोलीस याप्रकरणी अधिक चौकशी करत आहेत.

गोळीबार झाल्यानंतर 1 फेब्रुवारी 2026 मध्ये आरोपींनी सोशल मीडियाच्या माध्यमातून जबाबदारी स्वीकारली. पोस्टमध्ये लिहिलं, ‘आज रोहित शेट्टी याच्या घरावर जो गोळीबार झाला, त्याची जबाबदारी आम्ही घेत आहोत. पुढे सर्व बॉलिवूडकरांना चेतावनी आहे की, वेळ आहे तोपर्यंत सुधरा नाही तर, बाबा सिद्दीकी सारखी अवस्था होईल…’, याआधी देखील बिश्नोई टोळीने अनेक सेलिब्रिटींनी धमकी दिली आहे, तर अनेकांच्या घरावर गोळीबार केला आहे.