नाशिकचा वादग्रस्त भोंदूबाबा अशोक खरात याच्या धक्कादायक कारनाम्यांवर आधारित एक नवा चित्रपट लवकरच प्रेक्षकांच्या भेटीला येणार आहे. विशेष म्हणजे, या चित्रपटात प्रसिद्ध मराठी अभिनेत्री आणि शिवसेना नेत्या दीपाली सय्यद या एका अत्यंत महत्त्वाच्या भूमिकेत झळकणार आहेत. या बहुचर्चित चित्रपटात त्या राज्य महिला आयोगाच्या माजी अध्यक्षा रुपाली चाकणकर यांची भूमिका साकारताना दिसू शकतात, अशी जोरदार चर्चा सध्या रंगली आहे.
‘बिग बॉस’नंतर मिळाली खरातची माहिती अन् नागरिकांना दिला इशारा
या चित्रपटाबाबत बोलताना दीपाली सय्यद यांनी सांगितले की, ‘बिग बॉस’च्या घरातून बाहेर आल्यानंतरच मला भोंदूबाबा अशोक खरात आणि त्याच्या प्रकरणाची माहिती मिळाली. या चित्रपटात आपण एका महत्त्वपूर्ण भूमिकेत प्रेक्षकांसमोर येणार असल्याचे त्यांनी स्पष्ट केले. तसेच, नागरिकांना सतर्क करताना त्या म्हणाल्या की, “अशा भोंदूबाबांपासून प्रत्येकाने सावध राहिले पाहिजे. समाजात असे अनेक खरात आजही कुठे ना कुठे लपून बसले असतील.” मात्र, चित्रपटातील आपल्या अचूक भूमिकेबाबत त्यांनी सस्पेन्स कायम ठेवला आहे. “माझी भूमिका नेमकी काय असेल, हे मी आताच सांगणार नाही, ते तुम्हाला लवकरच चित्रपटात पाहायला मिळेल,” असे त्यांनी स्पष्ट केले.
रुपाली चाकणकरांवरील आरोपांवर सूचक भाष्य
भोंदूबाबा अशोक खरात प्रकरणात राज्य महिला आयोगाच्या माजी अध्यक्षा रुपाली चाकणकर यांच्यावरही काही आरोप झाले होते. यासंदर्भात विचारले असता, दीपाली सय्यद यांनी राजकीय क्षेत्रातील वास्तवावर बोट ठेवले. “राजकारणामध्ये जे कोणी काम करतात, त्यांच्यावर आरोप हे होतच असतात. मात्र, या संपूर्ण प्रकरणात रुपाली चाकणकर यांचा खरोखरच हात होता की नाही, हे तुम्हाला चित्रपट पाहिल्यानंतरच स्पष्ट होईल,” असे अत्यंत सूचक वक्तव्य दीपाली सय्यद यांनी केले आहे.
भोंदूबाबा खरातचे सत्य आणि या प्रकरणातील राजकीय पडद्यामागच्या घडामोडी या चित्रपटातून उलगडणार असल्याचा दावा केला जात आहे. त्यामुळे दीपाली सय्यद यांची भूमिका आणि चित्रपटाचे कथानक याबाबत आता मोठी उत्सुकता निर्माण झाली आहे.
