Alandi Temple Theft Case : आळंदी येथील श्री संत ज्ञानेश्वर महाराज मंदिरातील (Sant Dnyaneshwar Maharaj Temple Alandi) मुख्य दानपेटीतून विश्वासू सेवेकऱ्यानेच लाखो रुपयांची चोरी केल्याची धक्कादायक घटना नुकतीच समोर आली आहे. या खळबळजनक प्रकरणानंतर आता आळंदी देवस्थानला अखेर जाग आली. मंदिरातील कोणत्याही अधिकृत कामासाठी नियुक्त न केलेला विशाल वारुळे नावाचा संशयित व्यक्ती थेट मुख्य दानपेटीतील रक्कम जमा करण्याचं काम करत होता याची देवस्थानला अजिबात कल्पना नव्हती, अशी धक्कादायक कबुली देवस्थानचे विश्वस्त राजेंद्र उमाप यांनी दिली आहे.
विश्वस्तांच्या या मोठ्या कबुलीमुळे आळंदी देवस्थानचा अत्यंत गंभीर हलगर्जीपणा आणि सुरक्षेचा उडालेला बोजवारा आता चव्हाट्यावर आला आहे. कोट्यवधी भाविकांचे श्रद्धास्थान असलेल्या मंदिरात एवढा मोठा निष्काळजीपणा कसा झाला, असा संतप्त सवाल आता वारकरी आणि भाविकांमधून उपस्थित केला जात आहे.
मंदिराच्या सुरक्षेचे आणि पैशांच्या हिशोबाचे कोणतेही नियम न पाळता एका अनधिकृत व्यक्तीच्या हातात दानपेटी खोलण्याची आणि त्यातील रोख रक्कम गोळा करण्याची जबाबदारी कशी दिली गेली, याचे उत्तर सध्या देवस्थानकडे नाही. या गंभीर प्रकारामुळे मंदिराच्या अंतर्गत व्यवस्थापनावर मोठे प्रश्नचिन्ह निर्माण झाले आहे. या चोरीच्या घटनेमुळे आळंदी परिसरात वारकरी संप्रदायात तीव्र संतापाची लाट उसळली आहे.
या संपूर्ण चोरीच्या प्रकरणानंतर आणि देवस्थानवर चहूबाजूंनी टीका झाल्यानंतर, प्रशासनाने तातडीने पावले उचलण्यास सुरुवात केली आहे. देवस्थानने मंदिराचे मुख्य कॅशियर महेश गोखले यांच्यासह मंदिर व्यवस्थापक, प्रशासकीय अधिकारी आणि मुख्य आचाऱ्याला या प्रकरणी तात्काळ लेखी खुलासा करण्याचे आदेश दिले आहेत. या सर्वांना 'कारणे दाखवा' नोटीस बजावण्यात आली असून, त्यांच्याकडून स्पष्टीकरण मागवण्यात आलं आहे.
चोरीच्या या मोठ्या राड्यानंतर आळंदी देवस्थानने स्थानिक ग्रामस्थांची आणि प्रमुखांची एक महत्त्वाची बैठक घेतली. या बैठकीत भविष्यात अशा कोणत्याही प्रकारची अनुचित घटना घडू नये, यासाठी देवस्थानकडून अत्यंत कठोर नियमावली (Strict Rules) जाहीर करण्यात आली आहे. मंदिरातील प्रत्येक कर्मचाऱ्याची आणि सेवेकऱ्याची आता कडक तपासणी केली जाणार असून, पैशांच्या व्यवहाराच्या ठिकाणी सुरक्षा व्यवस्था अधिक मजबूत केली जाणार आहे.
दरम्यान, आळंदीतील स्थानिक नागरिक आणि भाविकांमधून अशी मागणी केली जात आहे की, देवस्थानने केवळ कर्मचाऱ्यांना 'कारणे दाखवा' नोटीस देऊन भागणार नाही. लाखो भाविकांच्या दानावर डल्ला मारणाऱ्या आणि या चोरीला अप्रत्यक्षपणे कारणीभूत ठरलेल्या सर्व जबाबदार दोषींवर कडक कायदेशीर कारवाई (Strict Legal Action) व्हायला हवी. तरच भविष्यात संत ज्ञानेश्वर माऊलींच्या पवित्र मंदिरामध्ये अशा लाजिरवाण्या घटनेची पुनरावृत्ती टळू शकेल.
ही बातमी वाचा:
