Tumbadche Manjula: झी स्टुडिओजच्या बहुचर्चित ‘तुंबाडची मंजुळा’ या आगामी मराठी चित्रपटाबद्दल प्रेक्षकांमध्ये आधीपासूनच मोठी उत्सुकता आहे. रहस्य, थरार आणि वेगळ्या कथानकामुळे चर्चेत असलेल्या या चित्रपटातील आता आणखी एक खास गाणं ‘देवा मला पाव की रे’ प्रेक्षकांच्या भेटीला आलं आहे. हे गाणं प्रदर्शित होताच सोशल मीडियावर त्याची जोरदार चर्चा सुरू झाली असून भावनिक शब्द आणि सुरेल संगीतामुळे हे गीत थेट प्रेक्षकांच्या मनाला स्पर्श करत आहे.

अभिनेत्री सई ताम्हणकरवर चित्रित करण्यात आलेल्या या गाण्यात संकटाच्या क्षणी देवाकडे धाव घेणाऱ्या मनाची आर्त भावना प्रभावीपणे मांडण्यात आली आहे. आयुष्यातील वेदना, असहायता आणि भावनिक संघर्ष यामध्ये माणूस श्रद्धेचा आधार शोधतो, हीच भावना या गाण्यातून अनुभवायला मिळते. गाण्यातील प्रत्येक शब्द आणि दृश्य प्रेक्षकांना अंतर्मुख करत असल्याची प्रतिक्रिया चाहत्यांकडून व्यक्त होत आहे.