Why Ranveer Singh Quitted Don 3: गेल्या काही दिवसांपासून अचानक सोडलेला 'डॉन 3' (Don 3) आणि त्यामुळे निर्माण झालेला वाद यामुळे बॉलिवूडचा (Bollywood News) बाजीराव म्हणून ओळखला जाणारा रणवीर सिंह (Ranveer Singh) चर्चेत आहे. रणवीर सिंह सध्या त्यांच्या 'धुरंधर' (Dhurandhar) फ्रँचायझीच्या अभूतपूर्व यशानंतर 'डॉन 3'मध्ये झळकणार असल्याच्या चर्चांना उधाण आलं आणि चाहत्यांच्या आनंदाला पारावार उरला नाही. पण, रणवीरनं अचानक माघार घेत अनेकांना बुचकळ्यात पाडलं. त्याच रणवीरच्या अशा या बेभरवशाच्या वागण्यामुळे 'फेडरेशन ऑफ वेस्टर्न इंडिया सिने एम्प्लॉईज'नं त्याला बॅन केलं. त्यामुळे आता रणवीर सिंहच्या अडचणींत मोठी वाढ झाल्याचं बोललं जात आहे.
दिग्दर्शक-निर्माता फरहान अख्तर (Director-Producer Farhan Akhtar) याच्या 'डॉन 3' सिनेमातून बाहेर पडण्याचा निर्णय रणवीर याच्यासाठी अडचणीचा ठरत असल्याची चर्चा आहे. सुरुवातीला हा विषय केवळ कलाकार बदलण्यापुरता मर्यादित असल्याचं वाटत होतं, मात्र आता तो कायदेशीर वादाच्या दिशेनं गेल्याचं सांगितलं जात आहे.
मिडिया रिपोर्टनुसार, फरहान अख्तर याच्या एक्सेल एंटरटेनमेंटनं रणवीर सिंह याच्याकडे 45 कोटी रुपयांच्या नुकसानभरपाईची मागणी केली आहे. याशिवाय 'फेडरेशन ऑफ वेस्टर्न इंडिया सिने एम्प्लॉईज' (FWICE) नंही रणवीर सिंह याच्याविरोधात नॉन-कोऑपरेशनचा आदेश जारी केल्याची चर्चा आहे. त्यामुळे नेमकं रणवीर सिंहनं 'डॉन 3' का सोडला? आणि त्याच्यात आणि फरहान अख्तर याच्यात नेमका कोणता वाद निर्माण झाला? हे जाणून घेण्याची उत्सुकता सर्वांनाच लागली आहे.
रणवीर सिंहनं 'डॉन 3' का सोडला?
खरं तर ही गोष्टी काही हल्लीहल्लीची नाही, तर ही गोष्ट आहे, 2023 मधली. त्यावेळी 'डॉन' फ्रँचायझीच्या तिसऱ्या भागाची अधिकृत घोषणा करण्यात आलेली. यासोबतच रणवीर सिंह याची या सिनेमात मुख्य भूमिकेसाठी, म्हणजेच 'डॉन'च्या भूमिकेसाठी निवड झाल्याचं जाहीर करण्यात आलं होतं. यापूर्वी या फ्रँचायझीमध्ये 'डॉन'ची भूमिका अमिताभ बच्चन आणि शाहरुख खान यांनी साकारली होती.
एवढंच काय तर, 'डॉन 3'मधला रणवीर सिंह याचा पहिला लूक आणि प्रमोशनल व्हिडीओसुद्धा प्रदर्शित करण्यात आला. त्यानंतर सोशल मीडियावर त्याची मोठ्या प्रमाणात चर्चा झाली. मात्र, त्यानंतर विविध कारणांमुळे या सिनेमाच्या निर्मितीत सातत्यानं विलंब होत गेला आणि पुढे या प्रकल्पाभोवती वादाचं सावट निर्माण झालं.
रणवीर सिंह आणि फरहान अख्तर यांच्यात नेमकं बिनसलं कुठे?
यानंतर अनेक ऑनलाइन वृत्तांमध्ये असा दावा करण्यात आला की, रणवीर सिंहनं चित्रपट निर्मात्यांसोबत झालेल्या क्रिएटिव्ह मतभेदांमुळे 'डॉन 3' सोडण्याचा निर्णय घेतला. फ्री प्रेस जर्नलच्या एका रिपोर्टनुसार, रणवीर सिंहला 'डॉन'च्या व्यक्तिरेखेची अधिक गडद, आक्रमक आणि तीव्र आवृत्ती साकारायची होती. या पात्रात अधिक प्रभावी संवाद, कठोर भाषा आणि वाढीव अॅक्शन सीन्सचा समावेश असावा, अशी त्याची इच्छा होती.
दुसरीकडे, दिग्दर्शक फरहान अख्तर 'डॉन' फ्रँचायझीच्या मूळ संकल्पनेशी आणि त्यांच्या मूळ दृष्टीकोनाशी प्रामाणिक राहण्याच्या भूमिकेत असल्याचं सांगितलं जातंय. यामुळे दोघांमध्ये कथानक आणि पात्राच्या मांडणीबाबत मतभेद निर्माण झाल्याची चर्चा होती.
मिडिया रिपोर्टनुसार, सिनेमाच्या निर्मितीत वारंवार होणारा उशीर आणि फायनल स्क्रिप्ट वेळेत तयार न होणं यामुळेही रणवीर सिंह नाराज होता. या कारणांमुळे त्यानं सिनेमातून माघार घेतल्याचे दावे करण्यात आले. मात्र, महत्त्वाची बाब म्हणजे, रणवीर सिंहनं 'डॉन 3' सोडण्यामागील कारणांबाबत अद्याप कोणतंही अधिकृत वक्तव्य केलेलं नाही. त्यामुळे या सर्व चर्चा आणि दावे हे माध्यमांतील अहवालांवर आधारित असून त्याला अधिकृत दुजोरा मिळालेला नाही.
रणवीरनं 'डॉन 3' सोडल्यानंतर फरहानची भूमिका काय?
फरहान अख्तरनं रणवीर सिंहसोबतच्या आपल्या मतभेदांविषयी भाष्य केलेलं. 'द हॉलिवूड रिपोर्टर इंडिया'ला दिलेल्या एका मुलाखतीदरम्यान, या अभिनेता-दिग्दर्शकानं म्हटलंय की, "मी शिकलेली गोष्ट म्हणजे, अनपेक्षित गोष्टींची अपेक्षा बाळगणं... जोपर्यंत एखादी गोष्ट प्रत्यक्ष सिनेमात पाहायला मिळत नाही, तोपर्यंत ती गृहीत धरता येत नाही..."
ABP माझाच्या बातम्या LIVE...
