विराट कोहली याने आरसीबीला सलग दुसऱ्यांदा आयपीएल ट्रॉफी जिंकून देण्यात प्रमुख योगदान दिलं. विराटने 31 मे रोजी अहमदाबादमध्ये झालेल्या 19 व्या हंगामातील अंतिम सामन्यात नाबाद अर्धशतक झळकावलं. विराटने 156 धावांचा पाठलाग करताना नाबाद 75 धावांची खेळी केली आणि आरसीबीला विजयी केलं. आरसीबीची रजत पाटीदार याच्या नेतृत्वात आयपीएल ट्रॉफी जिंकण्याची दुसरी वेळ ठरली. आरसीबीने आपल्या मोहिमेचा जबरदस्त शेवट केला. तर दुसऱ्या बाजूला रोहित शर्मा याच्या मुंबई इंडियन्स प्लेऑफमध्येही पोहचता आलं नाही. मात्र आता आयपीएलच्या 19 व्या मोसमाची सांगता झाली आहे. त्यामुळे पुन्हा एकदा आंतरराष्ट्रीय क्रिकेटचा थरार रंगणार आहे. त्यामुळे भारतीय क्रिकेट चाहत्यांना रोहित शर्मा आणि विराट कोहली या दोघांच्या कमबॅकची प्रतिक्षा असणार आहे. विराट आणि रोहित हे दोघे टीम इंडियाच्या जर्सीत केव्हा खेळायला उतरणार? याबाबत जाणून घेऊयात.

आयपीएलनंतर टीम इंडिया मायदेशात अफगाणिस्तान विरुद्ध भिडणार आहे. अफगाणिस्तान भारत दौऱ्यावर येणार आहे. अफगाणिस्तान टीम इंडिया विरुद्ध 1 कसोटी आणि 3 सामन्यांची एकदिवसीय मालिका खेळणार आहे. विराट आणि रोहित दोघांनीही कसोटी आणि टी 20I क्रिकेटमधून निवृत्ती घेतलीय. त्यामुळे दोघे आता फक्त एकदिवसीय क्रिकेटच खेळतात. त्यामुळे विराट-रोहित अफगाणिस्तान विरुद्ध वनडे सीरिजमध्ये खेळताना दिसणार आहेत.

भारत विरुद्ध अफगाणिस्तान यांच्यात 6 जूनपासून एकमेव कसोटी सामना खेळवण्यात येणार आहे. त्यानंतर 13 जूनपासून वनडे सीरिजला सुरुवात होणार आहे. त्यामुळे क्रिकेट चाहत्यांना विराट आणि रोहित पहिल्या सामन्यात खेळणं अपेक्षित आहेत. मात्र रोहित खेळणार की नाही? हे तेव्हाच स्पष्ट होईल. रोहित फिट असला तरच त्याला एकदिवसीय सामने खेळता येणार असल्याचं बीसीसीआयने आधीच स्पष्ट केलं आहे. त्यामुळे आता रोहित खेळणार की नाही? याची चाहत्यांना प्रतिक्षा असणार आहे.

अफगाणिस्तान विरूद्धच्या एकदिवसीय मालिकेसाठी भारतीय संघ : शुबमन गिल (कॅप्टन), श्रेयस अय्यर (उपकर्णधार), रोहित शर्मा (फिटनेसवर अवलंबून), विराट कोहली, केएल राहुल (विकेटकीपर), ईशान किशन (विकेटकीपर), नितीश कुमार रेड्डी, हार्दिक पंड्या (फिटनेसवर अवलंबून), वॉशिंग्टन सुंदर, कुलदीप यादव, अर्शदीप सिंह, प्रसिद्ध कृष्णा, गुरनूर बरार, हर्ष दुबे आणि प्रिंस यादव.