Captain Bharat Bhardwaj Viral Video : नाशिकच्या (Nashik) कॉम्बॅट आर्मी एव्हिएशन ट्रेनिंग स्कूलमध्ये (Combat Army Aviation Training School) नुकतंच दीक्षांत सोहळा संपन्न झाला. यावेळी नेहमीप्रमाणे लष्करी शिस्त, पराक्रम आणि आधुनिक विमानचालन कौशल्याचे दर्शन घडले. मात्र दीक्षांत संचलन सोहळ्यानंतर घडलेल्या एका प्रसंगाची सध्या देशभर चर्चा रंगू लागली असून या प्रसंगाने अनेकांची मने जिंकलीय. तर दुसरीकडे हा प्रसंग वादात सापडण्याची शक्यता वर्तवली जात आहे. झालं असं कि, प्रशिक्षण पूर्ण करून वैमानिक म्हणून नव्या जबाबदारीसाठी सज्ज झालेल्या भारत भारद्वाज यांनी आपल्या प्रेयसी आरुषीला सर्वांसमोर लग्नासाठी (Bharat Bhardwaj Proposes Girlfriend) मागणी घातली. विशेष म्हणजे, ज्या ठिकाणी भारत यांनी कठोर प्रशिक्षण पूर्ण केले, त्याच ठिकाणी दीक्षांत सोहळा संपल्यानंतर हेलिकॉप्टरसमोर गुडघ्यावर बसत त्यांनी आरुषीला अंगठी घालून लग्नासाठी प्रपोज केले. या अनपेक्षित क्षणाने उपस्थित अधिकारी, कुटुंबीय आणि मित्रमंडळी भारावून गेली. आरुषीनेही सर्वांसमोर हा प्रस्ताव स्वीकारताच परिसर टाळ्यांच्या कडकडाटाने दुमदुमून गेला. तर या प्रसंगाचा व्हिडीओ सध्या सोशल मीडियावरही चर्चेत आहे. तर दुसरीकडे या भावनिक क्षणाने लाखो लोकांची मने जिंकली असली तरी, त्यामुळे लष्कराच्या नियमांवर (Bharat Bhardwaj Acction) आणि कार्यपद्धतींवर एक वादविवादही सुरू झाला आहे.

 Indian Air Force : लष्कराने घेतली प्रकरणाची दखल,  कारवाई करण्याच्या तयारीत

मिळालेल्या माहितीनुसार, कॅप्टनच्या प्रपोजलच्या व्हायरल व्हिडिओची लष्कराने दखल घेतली असून, याबाबत स्पष्टीकरण देखील मागितल्या जाण्याची शक्यता आहे. या तरुण अधिकाऱ्याच्या बाजूने किंवा विरोधात मत व्यक्त करण्यापूर्वी काही गोष्टी लक्षात घेणं आवश्यक आहे. कॅप्टनची आपल्या प्रेयसीला प्रपोज करण्याची इच्छा लष्कराला समजते, परंतु प्रसंग आणि ठिकाण अयोग्य होते. तो एक तरुण अधिकारी असून त्याने कोणताही गंभीर गुन्हा केलेला नसल्यामुळे कोणतीही औपचारिक शिस्तभंगाची कारवाई होण्याची शक्यता नसली तरी, त्याच्या वरिष्ठांना या उल्लंघनांची माहिती देण्यात आली आहे आणि त्याला अधिकारी म्हणून आवश्यक असलेले नियम, कायदे आणि वर्तनाबद्दल संवेदनशील बनवण्यास सांगितले असल्याचीही चर्चा आहे.

Captain Bharat Bhardwaj : समाज माध्यमांवर चर्चा, निवृत्त वरिष्ठ अधिकारी तरुण पायलटच्या समर्थनार्थ

दुसरीकडे, नाशिकमधील पासिंग-आऊट परेडमध्ये भारतीय लष्कराचे हवाई अधिकारी कॅप्टन भरत भारद्वाज यांनी केलेला एक व्हायरल प्रस्ताव देशभरात चर्चेचा विषय बनला आहे. लष्करी नियमांचे उल्लंघन झाले आहे का, याची भारतीय लष्कर तपासणी करत असल्याचे वृत्त आहे, तर दुसरीकडे अनेक निवृत्त वरिष्ठ अधिकारी या तरुण पायलटच्या समर्थनार्थ पुढे आले आहेत. यावर बोलताना निवृत्त लेफ्टनंट जनरल के. जे. एस. ढिल्लन आणि निवृत्त मेजर जनरल राजू चौहान यांनी हा प्रस्ताव म्हणजे सुरक्षेचा भंग असल्याचा दावा फेटाळून लावला आहे. लेफ्टनंट जनरल ढिल्लन यांनी असा युक्तिवाद केला की, प्रेम व्यक्त केल्याने सैनिकाची शिस्त किंवा देशभक्ती कमी होत नाही, तर मेजर जनरल चौहान म्हणाले की, ही व्हायरल प्रतिमा लष्करासाठी एक सकारात्मक आणि प्रेरणादायी भरती पोस्टर म्हणून वापरली जाऊ शकते. हा व्हिडिओ हा वाद, लष्कराची कथित प्रतिक्रिया आणि तरुण कॅप्टनच्या बचावासाठी निवृत्त लष्करी अधिकाऱ्यांनी मांडलेले युक्तिवाद यावर प्रकाश टाकतो. असंही आता बोललं जात आहे.