दिल्लीतील मालवीय नगर परिसरातील हॉटेलमध्ये लागलेल्या भीषण आगीने संपूर्ण देश हादरला. या दुर्घटनेत अनेकांना जीव गमवावा लागला तर अनेक जण गंभीर जखमी झाले. सोशल मीडियावर समोर आलेल्या व्हिडिओंमध्ये लोक जीव वाचवण्यासाठी धडपडताना दिसत होते. या घटनेनंतर हॉटेलमध्ये राहणे कितपत सुरक्षित आहे, हा प्रश्न अनेक पर्यटकांच्या मनात निर्माण झाला आहे.

आजच्या घडीला प्रवास करताना हॉटेल हा मुक्कामाचा सर्वात सोयीचा पर्याय मानला जातो. मात्र केवळ आकर्षक खोली, कमी दर किंवा चांगले लोकेशन पाहून हॉटेल निवडणे धोकादायक ठरू शकते. स्वतःच्या आणि कुटुंबाच्या सुरक्षेसाठी काही महत्त्वाच्या गोष्टींची खात्री करून घेणे आवश्यक आहे.

आपत्कालीन मार्ग
हॉटेलमध्ये पोहोचताच आपत्कालीन बाहेर पडण्याचा मार्ग कुठे आहे हे जाणून घ्या. आग किंवा अन्य आपत्तीच्या वेळी धूर आणि गोंधळामुळे बाहेर पडण्याचा रस्ता शोधणे कठीण होते. आधीच माहिती असल्यास संकटाच्या वेळी मौल्यवान वेळ वाचू शकतो.

आग सुरक्षा
हॉटेलमध्ये फायर अलार्म, स्मोक डिटेक्टर आणि अग्निशामक यंत्रणा कार्यरत आहेत का याची खात्री करा. या सुविधा केवळ शोभेसाठी नसून आपत्कालीन परिस्थितीत जीव वाचवणाऱ्या ठरतात.

खोलीचा दरवाजा
खोलीत प्रवेश केल्यानंतर दरवाज्याचे लॉक, सेफ्टी चेन आणि इतर सुरक्षा यंत्रणा व्यवस्थित कार्यरत आहेत का ते तपासून घ्या. आपत्कालीन परिस्थितीत दरवाजा सहज उघडता आला पाहिजे आणि सुरक्षितही असला पाहिजे.

खिडक्या, बाल्कनीची स्थिती
खिडक्यांना कायमस्वरूपी ग्रील लावलेली असल्यास आपत्कालीन परिस्थितीत बाहेर पडणे कठीण होऊ शकते. त्यामुळे खिडक्या आणि बाल्कनी सुरक्षित तसेच वापरण्यायोग्य आहेत का हे पाहणे महत्वाचे आहे.

रिव्ह्यू वाचा
हॉटेल बुक करण्यापूर्वी इतर ग्राहकांचे अनुभव वाचा. स्वच्छता, सुरक्षा आणि कर्मचाऱ्यांचा प्रतिसाद याबाबतच्या प्रतिक्रिया अनेकदा वास्तव परिस्थितीची कल्पना देतात.

विद्युत उपकरणांची स्थिती
एसी, गिझर, इलेक्ट्रिक केटल यांसारखी उपकरणे जुनी किंवा खराब असल्यास शॉर्टसर्किटचा धोका वाढतो. खोलीत प्रवेश करताच उपकरणांची स्थिती तपासा आणि काही त्रुटी आढळल्यास त्वरित व्यवस्थापनाला कळवा.

हॉटेलचा संपर्क क्रमांक
आपत्कालीन परिस्थितीत रिसेप्शन किंवा जबाबदार कर्मचाऱ्यांचा मोबाईल क्रमांक फोनमध्ये सेव्ह करून ठेवा. नेटवर्क किंवा लँडलाईन सेवा बंद पडल्यास हा संपर्क उपयोगी ठरू शकतो.

सुरक्षेला प्राधान्य देणे
प्रवासाचा आनंद महत्त्वाचा असला तरी स्वतःची सुरक्षा त्याहून अधिक महत्त्वाची आहे. त्यामुळे पुढच्या वेळी हॉटेल बुक करताना किंमत आणि सुविधांसोबत सुरक्षा व्यवस्थेचीही खात्री करा.