Suryakumar Yadav T20 Mumbai: खेळाडू कितीही मोठा असो, जेव्हा त्याच्यावर अन्याय होतो किंवा त्याला अचानक पदावरून हटवले जाते, तेव्हा तो मैदानाबाहेर काय बोलतो यापेक्षा मैदानावर काय करतो, याला जास्त महत्त्व असते. भारताचा मिस्टर 360 सूर्यकुमार यादवने (SKY) नेमके हेच करून दाखवले. टी-20 वर्ल्ड कप जिंकून अवघे तीन महिने झाले असतानाच, सूर्याला अचानक टी-20 संघाच्या कर्णधारपदावरून हटवण्यात आले आणि त्याच्या जागी श्रेयस अय्यरकडे धुरा सोपवण्यात आली. या निर्णयामुळे सूर्या नाराज असल्याच्या चर्चा क्रिकेट वर्तुळात रंगल्या होत्या. मात्र, या सर्व वादाला आणि टीकाकारांना सूर्याने आपल्या बॅटने कडक शब्दांत उत्तर दिले आहे.
मुंबई टी-20 लीगमध्ये आज ट्रायम्फ नाईट्स एमएनई (Triumph Knights MNE) आणि एमएसई मराठा रॉयल्स (MSE Maratha Royals) यांच्यात सामना रंगला होता. या सामन्यात सूर्यकुमार यादवने आपल्या संतापाचे रूपांतर एका वादळी खेळीत केले आणि अवघ्या 36 चेंडूंमध्ये नाबाद 72 धावांची खेळी करत आपल्या संघाला एकतर्फी विजय मिळवून दिला.
या सामन्यात प्रथम फलंदाजी करताना एमएसई मराठा रॉयल्सने 20 ओव्हर्समध्ये 152 धावांचे आव्हान उभे केले होते. मराठा रॉयल्सकडून मॅक्सवेल स्वामीनाथनने 36 तर चिन्मय सुतारने 32 धावांचे योगदान दिले. 153 धावांच्या लक्ष्याचा पाठलाग करताना ट्रायम्फ नाईट्सची सुरुवात अतिशय खराब झाली. सलामीवीर अखिल हेरवाडकर अवघ्या 5 धावांवर तर वेदांत मुरकर 11 धावांवर बाद झाले. दोन्ही सलामीवीर स्वस्तात माघारी परतल्याने संघ अडचणीत सापडला होता.
दोन गडी लवकर गमावल्यानंतर सूर्यकुमार यादव मैदानात उतरला. त्याच्या सोबतीला नुतर गोयल होता. गोयलने एका बाजूने 56 धावांची संयमी खेळी खेळली. मात्र, दुसऱ्या बाजूने सूर्यकुमार यादवने वानखेडेचे मैदान अक्षरशः डोक्यावर घेतले. सूर्याने केवळ 36 चेंडूंमध्ये नाबाद 72 धावा ठोकल्या. या खेळीत त्याने 13 चौकार आणि 1 गगनभेदी षटकार लगावला. तब्बल 200 च्या स्ट्राईक रेटने खेळत सूर्याने मराठा रॉयल्सच्या गोलंदाजांची पार दाणादाण उडवली. त्याच्या या वादळी खेळीच्या जोरावर ट्रायम्फ नाईट्सने हे लक्ष्य अवघ्या 16 ओव्हर्समध्ये पूर्ण करत सामना खिशात घातला.
विशेष म्हणजे, शनिवारीच सूर्याला कर्णधारपदावरून हटवण्यात आल्याची बातमी आली होती. त्याच दिवशी त्याची आणि नवीन कर्णधार श्रेयस अय्यरची भेट झाली. यावेळी सूर्याने कोणताही आकस न ठेवता श्रेयसची गळाभेट घेतली आणि सामना जिंकल्यानंतर त्याच्या खेळीचे कौतुकही केले. पण आज जेव्हा तो स्वतः मैदानात उतरला, तेव्हा त्याच्या मनातली आग त्याच्या बॅटमधून स्पष्टपणे दिसून आली. सूर्याकुमारने या खेळीतून निवडकर्त्यांना आणि टीकाकारांना स्पष्ट संकेत दिले आहेत. 'मिस्टर 360' पाहायला मिळाला, यात शंका नाही.
इतर महत्वाच्या बातम्या
