महाराष्ट्राच्या राजकारणात मोठ्या घडामोडींना सुरुवात झाली आहे. उद्धव ठाकरे गटात पुन्हा एकदा फूट पडणार आहे. याआधी चार वर्षांपूर्वी 2022 साली शिवसेनेत उभी फूट पडली होती. एकनाथ शिंदे यांच्या नेतृत्वाखाली 40 आमदारांनी भाजपसोबत सरकार स्थापन केलं होतं. आज अधिकृत शिवसेना पक्ष आणि चिन्ह एकनाथ शिंदे यांच्याकडे आहे. उद्धव ठाकरे गटाच्या 9 खासदारांपैकी 6 खासदार वेगळा गट स्थापन करणार अशी चर्चा आहे. त्यासाठी राजधानी दिल्लीत घडामोडींना सुरुवात झाली आहे. काल रात्री खासदार संजय राऊत यांनी महाराष्ट्रातील खासदारांना विकत घेण्यासाठी 15 कोटी रुपयांचा Advance देणारं अशी पोस्ट केली होती. त्यावरुन उद्धव ठाकरे गटात फूट पडणार हे निश्चित दिसत आहे.

राज्यातील प्रमुख विरोधी पक्ष असलेला उद्धव ठाकरे गट फुटणार असल्याने महाराष्ट्रातील राजकीय पारा पुन्हा तापणार आहे. या घडामोडींमुळे उद्धव ठाकरे गटात मोठ्या प्रमाणात अस्वस्थतता वाढली आहे. या दरम्यान एकनाथ शिंदे यांच्या नेतृत्वावर विश्वास असलेल्या सर्वांसाठी दरवाजे खुले आहेत, असं शिवसेनेने म्हटलं आहे. ठाकरे गटातील या संभाव्य फुटीच्या पार्श्वभूमीवर आता शरद पवार गटाची प्रतिक्रिया समोर आली आहे.

शरद पवार गटाची प्रतिक्रिया काय?

शरद पवार यांचे नातू आणि एनसीपी-एसपी गटाचे आमदार रोहित पवार यांनी एक्सवर पोस्ट करुन भाजप प्रणीत महायुती सरकारवर निशाणा साधला आहे. “मध्यमवर्गीय लोकांना नोकऱ्या गमवाव्या लागत आहेत, युवकांना रोजगार मिळत नाहीय, महिलांच्या सुरक्षेवर गंभीर प्रश्नचिन्ह निर्माण होतय. आरोग्य व्यवस्थेचे बारा वाजलेत, एल-निनोचा प्रभाव आणि कमी पावसामुळे शेतकरी चिंतेत आहे, पाणी संकट गंभीर होत चाललय आणि दुसरीकडे आमदार-खासदारांची खरेदी-विक्रीचा बाजार गरम आहे” असं रोहित पवार यांनी म्हटलं आहे.

मध्यमवर्गीयांच्या असलेल्या नोकऱ्या जात आहेत, युवांना नोकऱ्या मिळत नाहीत, महिला सुरक्षेचा प्रश्न गंभीर आहे, आरोग्य व्यवस्थेचा बोजवारा उडलेला आहे, इकडे यंदा एल-निनो च्या परिणामाने पाऊस नसल्याने शेतकरी चिंतातुर आहे, पिण्याच्या पाण्याचा प्रश्न गंभीर आहे तर दुसरीकडे आमदार खासदारांचा…

— Rohit Pawar (@RRPSpeaks) June 16, 2026

रोहित पवार भडकले

उद्धव ठाकरे गटाच्या फुटीच्या शक्यतेमुळे रोहित पवार भडकले आहेत. “फुटणाऱ्यांना आणि फोडणाऱ्यांना दोघांना लाज वाटली पाहिजे. अशा प्रकारे लोकांचा विश्वास मोडणाऱ्यांना जनतेने लोकशाही मार्गाने राजकीय धडा शिकवावा, ही वेळेची मागणी आहे” असं रोहित पवार यांनी म्हटलय.

ठाकरेंनी बोलवलेल्या बैठकीला किती खासदार हजर होते?

उद्धव ठाकरे यांनी रविवारी पक्षाच्या खासदारांची बैठक बोलवली होती. या बैठकीला 9 पैकी फक्त चार खासदार व्यक्तिगत रित्या हजर होते. या दरम्यान शिंदे गटाचे नेते आणि मंत्री प्रताप सरनाईक बोलले की, खासदार-आमदारांना आपल्या नेतृत्वावर विश्वास नसेल, त्यांचा एकनाथ शिंदे यांच्यावर विश्वास असेल तर त्यांच्यासाठी शिवसेनेचे दरवाजे खुले आहेत.