England squad for India T20I series 2026 : हॅरी ब्रूकच्या नेतृत्वाखाली इंग्लंडचा संघ भारताविरुद्धच्या पाच ट्वेंटी-२० ( ENG vs IND ) सामन्यांच्या मालिकेत मैदानावर उतरणार आहे. हॅरी ब्रूक इंग्लंडच्या कसोटी संघाचा सदस्य आहे आणि तिसरी कसोटी संपल्यानंतर अवघ्या ४८ तासांत तो ट्वेंटी-२० मालिका खेळायला उतरेल. त्यासाठी त्याला नॉटिंगहॅम ते चेस्टर-ले-स्ट्रीट असा १५० माईल्सचा प्रवास करावा लागणार आहे. वर्ल्ड कप विजेत्या भारताला टक्कर देण्यासाठी जाहीर केलेल्या १७ वर्षीय संघात २२ वर्षीय जेम्स कोलेस ( James Coles) याची चर्चा आहे. भारतीयसंघाकडूनही वैभव सूर्यवंशी ( Vaibhav Sooryavanshi) पदार्पण करण्याची शक्यता आहे. त्यामुळे या दोन युवा खेळाडूंच्या कामगिरीवर सर्वांचे लक्ष आहे.

इंग्लंडने पाच सामन्यांच्या ट्वेंटी-२० आंतरराष्ट्रीय मालिकेसाठी १७ सदस्यीय संघ जाहीर केला आहे. या संघात ससेक्सचा अष्टपैलू खेळाडू जेम्स कोल्सचा समावेश आहे, परंतु मार्चमध्ये ट्वेंटी-२० वर्ल्ड कप स्पर्धेच्या उपांत्य फेरीत भारताकडून पराभूत झालेला बहुतांश संघ कायम आहे. वर्ल्ड कप स्पर्धेतील निराशाजनक कामगिरीनंतर जॉस बटलरने आपले स्थान कायम ठेवले आहे, तर ३६ वर्षीय लियाम डॉसनला संघात कायम ठेवणे ही आणखी एक उल्लेखनीय बाब आहे.

रेहान अहमद, जोफ्रा आर्चर, जेकब बेथेल, जॉर्डन कॉक्स आणि जोश टंग यांच्यासह ब्रूक हा तिसऱ्या कसोटी आणि ट्वेंटी-२० आंतरराष्ट्रीय मालिकेसाठी निवडलेल्या संघातील सहा खेळाडूंपैकी एक आहे. ट्वेंटी-२० वर्ल्ड कप स्पर्धेतील संघातल्या बेन डकेटला डावलले गेलेय, तर जेमी ओव्हरटनही ही मालिका मुकणार आहे.

गेल्या काही हंगामात ससेक्सकडून फ्रँचायझी क्रिकेट आणि इंग्लंड लायन्स संघाकडून प्रभावी कामगिरी केल्यानंतर, २२ वर्षीय कोल्सला पहिल्यांदाच संघात स्थान मिळाले आहे. तो एक डावखुरा फिरकी गोलंदाज असून मधल्या फळीत फलंदाजी करतो. या वर्षाच्या सुरुवातीला झालेल्या पहिल्या 'हंड्रेड' लिलावात तो सर्वात महागडा खेळाडू ठरला होता आणि लंडन स्पिरिट संघाने त्याला ३,९०,००० पौंडांचा करार दिला आहे.