आयपीएलमध्ये दिल्ली कॅपिटल्सकडून खेळणाऱ्या पश्चिम बंगालच्या अभिषेक पोरेल या क्रिकेटपटूवर लग्नाचे आमिष दाखवून शोषण केल्याचा आरोप करण्यात आला आहे. एका वरिष्ठ पोलीस अधिकाऱ्याने दिलेल्या माहितीनुसार, कर्नाटक येथील एका वैद्यकीय विद्यार्थिनीने मंगळवारी हुगळी जिल्ह्यातील मोगरा पोलीस ठाण्यात त्याच्याविरुद्ध तक्रार दाखल केली. पोरेल हा याच जिल्ह्यातील चंदननगरचा रहिवासी आहे. सूत्रांनी दिलेल्या माहितीनुसार, २३ वर्षीय क्रिकेटपटूने हे आरोप फेटाळून लावले असून ते खोटे असल्याचे म्हटले आहे. सध्या तो बेंगळुरूमध्ये असल्याचे समजते.

पोलिसांच्या म्हणण्यानुसार, तक्रारदार तरुणीचा आरोप आहे की ती गेल्या तीन वर्षांपासून अभिषेक पोरेलच्या संपर्कात होती आणि दोघांनी लग्न करण्याचा निर्णय घेतला होता. मात्र, दीड वर्षापूर्वी त्यांच्यात मतभेद निर्माण झाले होते हे, प्रकरण यापूर्वीही पोलीस ठाण्यापर्यंत पोहोचले होते; तरीही त्यावेळी कोणतीही अधिकृत तक्रार दाखल करण्यात आली नव्हती. मात्र, यावेळी त्या तरुणीने आपल्या आईसोबत पोलीस ठाण्यात जाऊन अधिकृत तक्रार नोंदवली.

हे प्रकरण समोर आल्यानंतर हुगळी (ग्रामीण) पोलीस अधीक्षक कुंवर भूषण सिंह यांनी मोगरा पोलीस ठाण्याला भेट दिली. त्यांनी प्रभारी निरीक्षक सौमेन बिस्वास आणि डीएसपी अभिजीत सिंह महापात्रा यांच्याशी या प्रकरणाबाबत चर्चा केली. या प्रकरणाचा तपास सुरू असल्याची पुष्टी पोलिसांनी केली आहे. एका वरिष्ठ अधिकाऱ्याने सांगितले की, “तक्रार नोंदवण्यात आली आहे आणि आम्ही तपास सुरू केला आहे.”

भारतीय क्रिकेटपटू रिषभ पंतच्या जागी अभिषेक पोरेलला आयपीएलमध्ये दिल्ली कॅपिटल्सकडून खेळण्याची संधी मिळाली होती. त्या हंगामात त्याने केवळ चार सामने खेळले आणि त्यात फारशा धावा केल्या नाहीत, तरीही फ्रँचायझीने त्याच्यावर विश्वास कायम ठेवला आणि त्याला संघात कायम ठेवले.

अलीकडील हंगामांमध्ये, आपल्या प्रभावी फलंदाजीच्या जोरावर एक तरुण यष्टिरक्षक-फलंदाज म्हणून त्याने संघाचा विश्वास संपादन केला आहे. अभिषेक पोरेलने ३५ आयपीएल सामन्यांत २५.६३ च्या सरासरीने ७६९ धावा केल्या आहेत, ज्यात चार अर्धशतकांचा समावेश आहे. याव्यतिरिक्त, त्याने २३ लिस्ट-ए (List-A) सामन्यांत ४३.८४ च्या सरासरीने ८३३ धावा आणि ६१ टी-२० सामन्यांत ३० च्या सरासरीने १,५९० धावा केल्या आहेत.