मुखात 'गोविंदा'चा गजर आणि मनात अढळ विश्वास!
तिरुपतीमध्ये आपल्या कुटुंबासह राहणाऱ्या नवनीतम्मा यांनी कोणत्याही वाहनाचा किंवा डोलीचा आधार न घेता, पारंपरिक आणि कठीण अशा 'अलिपिरी' पादचारी मार्गाची निवड केली. सुमारे ११ किलोमीटरचा हा मार्ग आणि त्यावर असलेल्या तब्बल ३,५५० पायऱ्या चढताना तरुणांचाही श्वास फुलतो. पण, हातात काठी, डोळ्यात बालाजीच्या दर्शनाची आस आणि मुखात अखंड चाललेला "गोविंदा-गोविंदा" या नामाचा गजर... या बळावर नवनीतम्मा यांनी प्रत्येक पायरी पार केली. त्यांचे हे रूप पाहून वाटेतील इतर भाविकही भावूक झाले आणि अनेकांनी त्यांच्या चरणी हात जोडले.
मुख्यमंत्री चंद्राबाबू नायडू भावूक; म्हणाले, "भक्तीपुढे वय हा केवळ एक आकडा!"
हा हृदयस्पर्शी व्हिडिओ जेव्हा आंध्र प्रदेशचे मुख्यमंत्री एन. चंद्राबाबू नायडू यांच्यापर्यंत पोहोचला, तेव्हा त्यांनी 'X' वर पोस्ट करत आजींचे कौतुक केले. त्यांनी लिहिले: "खऱ्या भक्तीपुढे वय हा केवळ एक आकडा असतो. ११६ वर्षांच्या या आजींनी भगवान वेंकटेश्वर स्वामींचे आशीर्वाद घेण्यासाठी तिरुमलापर्यंतचा प्रवास पायी पूर्ण केला. त्यांची निष्ठा आणि त्यांना मिळालेला कुटुंबाचा आधार खरोखरच प्रेरणादायी आहे."
'त्या' एका निश्चयापुढे कुटुंबानेही टेकले गुडघे
नवनीतम्मा यांच्या नातवाने सांगितले की, वय खूप जास्त असल्याने सुरुवातीला कुटुंबाने त्यांना पायी जाण्यास नकार दिला होता. 'तुम्हाला त्रास होईल' असे सर्वजण सांगत होते. परंतु, आजींनी मनात एकदा का निश्चय केला की त्या मागे हटणाऱ्या नव्हत्या. "मला माझ्या गोविंदाला चालतच भेटायला जायचे आहे," या त्यांच्या एका शब्दापुढे अखेर कुटुंबानेही होकार दिला आणि त्यांच्या विश्वासाने अशक्य गोष्टीलाही शक्य करून दाखवले.
मंदिर प्रशासनाकडून 'व्हीआयपी' सन्मान आणि महाप्रसाद
मुख्यमंत्र्यांच्या ट्विटनंतर तिरुमला तिरुपती देवस्थानम (TTD) चे अध्यक्ष बी. आर. नायडू यांनी तात्काळ अधिकाऱ्यांना आजींचा शोध घेण्यास सांगितले. मंदिर प्रशासनाने आजींसाठी आणि त्यांच्या संपूर्ण कुटुंबासाठी विशेष 'व्हीआयपी ब्रेक दर्शना'ची व्यवस्था केली.
भावनिक क्षण तेव्हा पाहायला मिळाला जेव्हा दर्शन झाल्यानंतर, मंदिर परिसरातील 'रंगनायकूला मंडपम' येथे स्वतः मंदिराच्या कार्यकारी अधिकाऱ्यांनी आणि वैदिक पंडितांनी नवनीतम्मा यांना रेशमी वस्त्रे आणि 'श्रीवारी प्रसादाचा' अहेर देऊन त्यांच्या चरणी लोटांगण घातले आणि त्यांचा आशीर्वाद घेतला.
नेटकर्यांनी केले कौतुक
हा व्हिडिओ सोशल मीडियावर वाऱ्यासारखा पसरला असून नेटकरी आजींचे कौतुक करताना थकत नाहीयेत. एका युझरने लिहिले, "आजची तरुण पिढी चार पायऱ्या चढल्या तरी थकून जाते, तिथे ११६ वर्षांच्या माउलीने ३,५५० पायऱ्या चढून दाखवल्या; हीच खरी भक्ती!" तर दुसऱ्याने लिहिले, "माणसाची खरी ताकद त्याच्या शरीरात नाही, तर त्याच्या मनात आणि श्रद्धेत असते, हे आजींनी सिद्ध केले."
नवनीतम्मा यांचा हा प्रवास केवळ एक तीर्थयात्रा नव्हती; तर तो प्रत्येक माणसाला दिलेला एक सुंदर संदेश आहे की, जर ध्येय गाठण्याची जिद्द मनात पक्की असेल, तर जगातील कोणतीही अडचण तुम्हाला रोखू शकत नाही!
