मनोज जैयस्वाल | वाशिम प्रतिनिधी | साम टीव्ही मराठी

Washim BSc Nursing student death investigation : वाशीम येथील शासकिय नर्सिंग महाविद्यालयात बीएससी नर्सिंगच्या दुसऱ्या वर्षात शिकणाऱ्या एका विद्यार्थिनीने गळफास घेऊन आत्महत्या केल्याची धक्कादायक घटना घडली आहे. नेत्रा लाड असे मृत विद्यार्थिनीचे नाव असून ती कारंजा तालुक्यातील मोहगव्हाण येथील रहिवासी होती. या घटनेमुळे शैक्षणिक वर्तुळात आणि परिसरात मोठी खळबळ उडाली आहे.

भाड्याच्या खोलीत घेतला गळफास

शिक्षणासाठी नेत्रा वाशीममधील गव्हाणकर नगर भागात एका भाड्याच्या खोलीत राहत होती. तिने खोलीतच टोकाचे पाऊल उचलल्याचे समोर आले. घटनेची माहिती मिळताच वाशीम शहर पोलिसांनी तातडीने घटनास्थळी धाव घेत पंचनामा केला. त्यानंतर मृतदेह शवविच्छेदनासाठी जिल्हा सामान्य रुग्णालयात पाठवण्यात आला आहे.

निकालाचा तणाव की अन्य काही कारण?

नुकताच बीएससी नर्सिंगचा निकाल लागला असून, या निकालात आलेल्या अपयशामुळे किंवा कमी गुणांमुळे नेत्रा गेल्या काही दिवसांपासून मानसिक तणावाखाली असल्याची चर्चा प्राथमिक स्तरावर सुरू आहे. मात्र, तिच्या खोलीत कोणतीही सुसाईड नोट सापडली आहे का, किंवा आत्महत्येचे नेमके कारण काय, हे अद्याप स्पष्ट झालेले नाही. पोलिसांनी सध्या तरी निकालाच्या कारणाला अधिकृत दुजोरा दिलेला नाही.

पोलिसांचा तपास सुरू

या घटनेनंतर पोलिसांनी अकस्मात मृत्यूची नोंद केली असून, पुढील तपास सुरू केला आहे. नेत्राच्या खोलीतील वस्तू आणि मोबाईलचीही तपासणी केली जाण्याची शक्यता आहे. तिच्या कुटुंबीयांना या घटनेची माहिती देण्यात आली असून, त्यांच्या जबाबानानंतर काही नवीन माहिती समोर येण्याची शक्यता आहे.

टीप: मानसिक तणावाशी झगडत असाल तर मानसोपचार तज्ज्ञांची मदत घ्या. जिल्हा सामान्य रुग्णालय किंवा मानसोपचार हेल्पलाईनशी संपर्क साधा.