'E-20 पार्टी'ची चर्चा जोर धरू लागली आहे. इथेनॉल-मिश्रित पेट्रोल खरेदी करण्याच्या सक्तीला विरोध करण्यासाठी स्थापन झालेल्या या नवीन पक्षाने संसदेवर मोर्चा काढण्याची घोषणा केली आहे. विशेष म्हणजे, यापूर्वी 'कॉकरोच जनता पार्टी'नेही पेपरफुटीच्या विरोधात आणि शिक्षण मंत्री धर्मेंद्र प्रधान यांच्या राजीनाम्याच्या मागणीसाठी संसदेवर पायी मोर्चा काढला होता. सोशल मीडियावर या पक्षाच्या अनुयायांची संख्या वेगाने वाढत आहे.

20 जुलै रोजी 'चलो संसद' मोर्चाचे आयोजन करण्यात आले होते. देशातील शिक्षण व्यवस्थेत सुधारणा, विद्यार्थ्यांच्या हक्कांचे संरक्षण आणि उत्तरदायित्व निश्चित करण्याच्या मागण्यांसाठी या चलो संसद या मोर्चाचे आयोजन करण्यात आले होते. मोठ्या संख्येने नागरिक, विद्यार्थी  या मोर्चात सहभागी झाले होते. यावेळी पोलिसांचा मोठा बंदोबस्त तैनात करण्यात आला असून पोलिसांकडून आंदोलकांवर लाठीचार्ज करण्यात आला होता. याच पार्श्वभूमीवर आज दिल्लीतील लाठीचार्ज विरोधात सुनावणी होणार आहे. प्रश्नपत्रिका फुटीच्या मुद्द्यावर ‘कॉक्रोच जनता पार्टी’ने सोमवारी आयोजित केलेल्या ‘संसद चलो’ मोर्चादरम्यान विद्यार्थ्यांवर पोलिसांनी केलेल्या कारवाईच्या विरोधात सर्वोच्च न्यायालयात दोन स्वतंत्र याचिका दाखल झाल्या आहेत.

वैभववाडी : एका महिलेने दिलेल्या फिर्यादीवरून कोल्हापूर येथील ऊस उत्पादक रामचंद्र तुकाराम भोगम (रा. कळंबा) याच्याविरोधात बलात्काराचा गुन्हा दाखल झाला आहे. गेले तीन दिवस पोलिस त्याचा शोध घेत होते. हा प्रकार २३ एप्रिल रोजी तालुक्यातील एका गावात घडला असून, पीडित महिलेने २० जुलैला वैभववाडी पोलिसांत फिर्याद दिली होती.

राज्यात एसआयआर मोहीम सुरू असल्याने राज्य निवडणूक आयोगाने ग्रामपंचायतींच्या निवडणुकीसाठी प्रसिद्ध होणारी अंतिम मतदार यादी ४ ऑगस्ट रोजी जाहीर करण्यास स्थगिती दिली आहे. एसआयआर मोहिमेनंतर प्रसिद्ध होणारी विधानसभा मतदारसंघनिहाय यादी ग्रामपंचायत निवडणुकीसाठी तयार करण्यास राज्य निवडणूक आयोगास विनंतीही केली आहे.

NEET परीक्षेतील गैरप्रकार आणि पेपर फुटीच्या वादावरून देशभरात विद्यार्थ्यांचे तीव्र आंदोलन सुरू असतानाच, आता केंद्र सरकार सार्वजनिक परीक्षांमध्ये होणाऱ्या अशा गैरप्रकारांना आळा घालण्यासाठी आज संसदेत सुधारित 'अँटी-पेपर लीक' विधेयक मांडणार आहे. 

ओतूर : माळशेज घाटात अहिल्यानगर-कल्याण महामार्ग करंजाळे (ता. जुन्नर) येथे सुमारे सात फूट खचल्याने गंभीर परिस्थिती निर्माण झाली आहे. सततच्या मुसळधार पावसामुळे रस्ता खचला असून, सुरक्षिततेसाठी एसटी बससेवा तात्पुरती बंद करण्यात आली आहे, तर उर्वरित वाहतूक एकेरी मार्गाने सुरू आहे. माळशेज घाटात रस्त्याच्या सिमेंट काँक्रीटच्या भागाला केवळ शनिवारी (ता. २५) भेग पडली होती. मात्र, रात्रभर सुरू असलेल्या पावसामुळे रस्त्याखालची माती वेगाने वाहून गेल्याने रविवारी (ता. २६) सकाळी हाच भाग मोठ्या प्रमाणात कोसळला. यामुळे रस्त्याच्या मधोमध एक मोठा खड्डा तयार झाला आहे.

दुधेबावी : वीर धरणाची पाणीपातळी नियंत्रित ठेवण्यासाठी आज सकाळी नऊ वाजल्यापासून धरणाच्या सांडव्यावरील पाण्याचा विसर्ग वाढविण्यात येणार असल्याची माहिती नीरा उजवा कालवा विभागाने दिली आहे. धरणाच्या सांडव्यावरून १३ हजार ९११ क्युसेक, तर अतिवाहकाद्वारे एक हजार १०० क्युसेक असा एकूण १५ हजार ११ क्युसेक पाण्याचा विसर्ग नीरा नदीपात्रात सुरू करण्यात येणार आहे. परिसरात सुरू असलेल्या पावसाच्या प्रमाणानुसार तसेच धरणात होणाऱ्या पाण्याच्या आवकानुसार हा विसर्ग कमी-जास्त करण्यात येण्याची शक्यता असल्याचेही विभागाने स्पष्ट केले आहे.

सांगरूळ : येथे दोन दिवसांपासून भटक्या आणि पिसाळलेल्या कुत्र्याने धुडगूस घातला असून, नागरिकांत भीतीचे वातावरण आहे. या कुत्र्याने तब्बल आठ जणांचा चावा घेऊन त्यांना गंभीर जखमी केले आहे. हल्ल्यात भिकाजी पाटील आणि बबन जाधव यांच्या बोटाला, बळवंत खाडे यांच्या हाताच्या दंडाला, तर कुंडलिक खाडे यांच्या मांडीला कुत्र्याने गंभीर चावा घेतला आहे. वैशाली देसाई यांच्या तोंडाला व डोळ्याला दुखापत झाली. अनिल सुतार आणि कुंडलिक नाळे कुत्र्याच्या हल्ल्यात जखमी झाले आहेत. मारुती परितकर यांच्यावरही या कुत्र्याने प्राणघातक हल्ला केला. याशिवाय मदिना मुल्ला यांच्या हातावर पिसाळलेल्या कुत्र्याने हल्ला केला. सर्व जखमींवर ‘सीपीआर’ रुग्णालयात उपचार सुरू आहेत.

जयसिंगपूर : उदगाव (ता. शिरोळ) येथील सुन्नत जमातुल मुस्लिमीन जामा मस्जिद ट्रस्टच्या व्यवस्थापन समिती निवडणुकीसाठी सोमवारी (ता. २७) मतदान होणार आहे. ही निवडणूक बेकायदेशीरपणे होत असून या निवडणुकीवर शंभर पात्र सदस्यसह ७०० जणांचा बहिष्कार टाकणार असल्याची माहिती मुस्लिम समाजाचे शकील जमादार यांच्यासह उमेदवारांनी दिली. यावेळी तौफिक गद्याळ, शब्बीर नदाफ, नासिर मुजावर, हर्षद जमादार, बाळू नदाफ, सादिक मुजावर, वासीम मोळे, बकश पेंढारी यांच्यासह समाजातील प्रतिनिधी उपस्थित होते.

Latest Marathi Live Updates 27 July 2026 : राळेगाव (जि. यवतमाळ) येथे सरकारच्या कर्जमाफीच्या आश्वासनाने पुन्हा एकदा जिल्ह्यातील एका शेतकरी कुटुंबाचा संसार उद्ध्वस्त केला आहे. मध्यवर्ती बँक राळेगाव येथे लागलेल्या कर्जमाफीच्या यादीत नाव न आल्याच्या नैराश्यातून तालुक्यातील भांब येथील शेतकरी राजू बापूराव चुड्डुके (वय ४९) यांनी शनिवारी (ता. २५) रात्री विष प्राशन करून जीवन संपविले. कर्जमाफीच्या यादीत नाव येईल या आशेने ते शनिवारी मध्यवर्ती बँकेच्या राळेगाव शाखेत गेले होते. मात्र, यादीत नाव न दिसल्याने ते निराश झाले. घरी परतल्यानंतर रात्री दहाच्या सुमारास त्यांनी घरातच विष प्राशन केले. याशिवाय देश-राज्यातील इतर महत्त्वाच्या घडामोडी, वाहतूक कोंडी, राजकीय हालचाली, क्रीडा, मनोरंजन आणि मान्सूनविषयक अपडेट्स यांची सविस्तर माहिती एका क्लिकवर उपलब्ध आहे.