रेल्वेच्या एसी डब्यात एका प्रवाशाने चक्क तेलाचा दिवा आणि अगरबत्ती पेटवून पूजा केल्याचा व्हिडिओ सोशल मीडियावर मोठ्या प्रमाणात व्हायरल होतो आहे. या घटनेनंतर प्रवाशांच्या सुरक्षेचा मुद्दा पुन्हा ऐरणीवर आला असून, संबंधित व्यक्तीवर कारवाई करण्याची मागणी नेटिझन्सकडून करण्यात येत आहे.

व्हायरल व्हिडिओमध्ये एक प्रवासी एसी कोचमधील वरच्या बर्थवर बसून धार्मिक विधी करताना दिसत आहे. त्याने समोर तेलाचा दिवा आणि अगरबत्ती पेटवली आहे. हे पाहताच डब्यातील दुसऱ्या प्रवाशाने त्याला याबाबत जाब विचारला. बंदिस्त एसी डब्यात उघडी ज्योत पेटवणे धोकादायक ठरू शकते, असे सांगत त्याने दिवा तात्काळ विझवण्याची विनंती केली.

व्हिडिओमध्ये चित्रीकरण करणारी व्यक्तीही अगरबत्तीच्या धुरामुळे डब्यातील स्मोक डिटेक्शन यंत्रणा सक्रिय होऊ शकते, तर तेलाच्या दिव्यामुळे आग लागण्याचा धोका निर्माण होऊ शकतो, असे सांगताना ऐकू येतो आहे. त्यामुळे इतर प्रवाशांच्या सुरक्षेशी कोणतीही तडजोड करता येणार नाही, अशी भूमिका त्या प्रवाशाने घेतली.

ही घटना नेमकी कोणत्या गाडीत आणि कधी घडली, याची अधिकृत माहिती अद्याप समोर आलेली नाही. मात्र, व्हिडिओ व्हायरल झाल्यानंतर सोशल मीडियावर यावर जोरदार चर्चा सुरू झाली आहे. अनेकांनी सार्वजनिक ठिकाणी, विशेषतः रेल्वेसारख्या बंदिस्त जागेत उघडी ज्योत पेटवणे चुकीचे असल्याचे मत व्यक्त केलं आहे.

दरम्यान, या व्हिडिओची दखल घेत रेल्वे सेवाने संबंधित पोस्टवर प्रतिक्रिया दिली आहे. त्यांनी पुढील कारवाईसाठी ट्रेन क्रमांक आणि पीएनआर क्रमांकाची माहिती मागितली आहे. या घटनेनंतर रेल्वेतील अग्निसुरक्षा नियम आणि प्रवाशांनी पाळायच्या सुरक्षा मार्गदर्शक सूचनांबाबत पुन्हा चर्चा सुरू झाली आहे.