BCCI announces India squad for Sri Lanka Test series : श्रीलंकेविरुद्ध पुढील महिन्यात होणाऱ्या दोन कसोटी सामन्यांच्या मालिकेसाठी भारतीय संघाची घोषणा करण्यात आली. अष्टपैलू खेळाडू रवींद्र जडेजा ( Ravindra Jadeja) याचे पुनरागमन झाले आहे. शुभमन गिलच्या नेतृत्वाखाली भारतीय संघ ही मालिका जिंकून जागतिक कसोटी अजिंक्यपद स्पर्धेच्या फायनलमध्ये जाण्यासाठी जोर लावेल. जसप्रीत बुमराह, साई सुदर्शन संघात आहेत, परंतु त्यांच्या फिटनेस अहवालावर पुढील गणित अवलंबून राहणार आहे. वॉशिंग्टन सुंदरला दुखापतीमुळे पहिल्या सामन्याला मुकावे लागले आहे.

दरम्यान, जाहीर झालेल्या संघात उप कर्णधार म्हणूऩ लोकेश राहुलचे नाव दिसल्याने सर्वांना आश्चर्याचा धक्का बसला आहे. रिषभ पंत हा प्रमुख यष्टिरक्षक-फलंदाज म्हणून निवडले आहे, तर राखीव यष्टिरक्षक फलंदाज म्हणून ध्रुव जुरेल संघात आहे. वॉशिंग्टनच्या जागी फिरकीपटू सारांश जैन याला संधी मिळाली आहे. श्रीलंकेच्या कसोटी संघात बरेच डावखुरे फलंदाज आहेत आणि अशात जैनची निवड महत्त्वाची ठरेल. श्रीलंका अ विरुद्धच्या चार दिवसीय सामन्यात भारत अ संघाचे प्रतिनिधित्व करताना त्याने उल्लेखनीय कामगिरी केली होती. त्याने दोन्ही डावात मिळून ६ विकेट्स घेतल्या आणि दुसऱ्या डावात नाबाद ७० धावांची खेळीही केली.