बॉलिवूडमध्ये अनेक चित्रपट प्रदर्शित होतात, मात्र काही चित्रपट असे असतात जे दशकानुदशके प्रेक्षकांच्या मनात घर करून राहतात. 1988 मध्ये प्रदर्शित झालेला ‘तेजाब’ हा असाच एक चित्रपट आहे. अनिल कपूर आणि माधुरी दीक्षित यांच्या प्रमुख भूमिका असलेल्या या चित्रपटाने बॉक्स ऑफिसवर अभूतपूर्व यश मिळवले. प्रदर्शित झाल्यानंतर तब्बल 50 आठवडे हा चित्रपट चित्रपटगृहांमध्ये चालला आणि त्या वर्षातील सर्वाधिक चर्चेत राहिलेल्या चित्रपटांपैकी एक ठरला.

‘तेजाब’मुळे अनिल कपूरच्या ‘अँग्री यंग मॅन’ भूमिकेला अधिक बळ मिळाले, तर माधुरी दीक्षितला या चित्रपटाने घराघरात लोकप्रियता मिळवून दिली. चित्रपटातील ‘एक दो तीन’ हे गाणे प्रचंड गाजले आणि आजही विविध कार्यक्रम, स्टेज शो आणि समारंभांमध्ये ते आवर्जून वाजवले जाते. या गाण्यामुळे माधुरी दीक्षितच्या कारकिर्दीला मोठी चालना मिळाली.

चंकी पांडेच्या भूमिकेसाठी पहिली पसंती होती गोविंदा

चित्रपटातील ‘बब्बन’ ही महत्त्वाची भूमिका अभिनेता चंकी पांडे यांनी साकारली होती. मात्र, अनेकांना माहीत नसलेली बाब म्हणजे ही भूमिका सुरुवातीला अभिनेता गोविंदाला ऑफर करण्यात आली होती. विविध बातम्यानुसार तारखांच्या अडचणीमुळे गोविंदा हा चित्रपट करू शकले नाही. त्यानंतर ही भूमिका चंकी पांडे यांच्याकडे आली आणि त्यांनी आपल्या दमदार अभिनयाने ती संस्मरणीय बनवली. आजही ‘तेजाब’ची चर्चा झाली की चंकी पांडे यांचा ‘बब्बन’ हा अभिनय विशेष आठवला जातो.

दिग्दर्शक एन. चंद्रा यांच्या दिग्दर्शनाखाली तयार झालेल्या या चित्रपटात अनिल कपूर, माधुरी दीक्षित, चंकी पांडे, अनुपम खेर, किरण कुमार, मंदाकिनी, अरुणा इराणी आणि अनु कपूर यांसारख्या दिग्गज कलाकारांनी महत्त्वाच्या भूमिका साकारल्या होत्या. प्रेम, सूड, भावना, अॅक्शन आणि संस्मरणीय संगीत यांचा उत्कृष्ट संगम या चित्रपटात पाहायला मिळाला.

आजही कायम आहे ‘तेजाब’ची लोकप्रियता

प्रदर्शित होऊन जवळपास चार दशके उलटून गेली असली तरी ‘तेजाब’ची लोकप्रियता आजही कायम आहे. दूरदर्शनवर हा चित्रपट प्रदर्शित झाला की प्रेक्षक आवर्जून पाहतात. त्यातील गाणी आणि संवाद आजही तितकेच लोकप्रिय आहेत. याच कारणामुळे ‘तेजाब’चा समावेश हिंदी चित्रपटसृष्टीतील सर्वाधिक यशस्वी आणि संस्मरणीय चित्रपटांच्या यादीत केला जातो.