சென்னை அடுத்த மாமல்லபுரத்தில் பாட்டாளி மக்கள் கட்சியின் பொதுக்குழு கூட்டம் சிறப்பாக நடைபெற்றது. இந்த கூட்டத்தில் கட்சி தலைவராக அன்புமணி ராமதாஸும், பொதுச்செயலாளராக வடிவேல் இராவணனும், பொருளாளராக திலகபாமாவும் மீண்டும் ஒருமனதாகத் தேர்வு செய்யப்பட்டனர். அரசியலிலிருந்து ஓய்வு பெறுவதாக அறிவித்த மருத்துவர் ராமதாஸ் உடன் இணைந்து செயல்பட்ட பேராசிரியர் தீரன், பு.த.அருள்மொழி உள்ளிட்ட முக்கிய நிர்வாகிகள் அன்புமணி முன்னிலையில் இந்த பொதுக்குழுவில் பங்கேற்றனர். கூட்டத்தில் மொத்தம் 31 முக்கிய தீர்மானங்கள் நிறைவேற்றப்பட்டன.
பொதுக்குழுவில் தலைமை உரையாற்றிய பாமக தலைவர் அன்புமணி ராமதாஸ், மருத்துவர் ஐயாவின் கொள்கைகளை நிறைவேற்றி 2031-ல் பாமக ஆட்சியை அமைப்பதே அவருக்கு நாம் செய்யும் நன்றிக்கடன் என்று குறிப்பிட்டார். மேலும், வருகின்ற அக்டோபர் 2-ம் தேதி காந்தி ஜெயந்தி அன்று சௌமியா அன்புமணி தலைமையில் தமிழ்நாடு முழுவதும் 2 ஆண்டுகள் தொடர்ச்சியாக மதுவிலக்கு விழிப்புணர்வு பிரச்சாரம் மேற்கொள்ளப்படும் என அறிவித்தார். அத்துடன், பாமகவை அடுத்த கட்டத்திற்கு கொண்டு செல்லும் முயற்சியாக விரைவில் ஆந்திர மாநிலத்திலும் கட்சி தொடங்கப்பட உள்ளதாகவும், அதற்காக வரும் சனிக்கிழமை அனைத்து மாவட்ட நிர்வாகிகளுடன் ஆலோசனைக் கூட்டம் நடைபெறவுள்ளதாகவும் தெரிவித்தார்.
மேகதாது அணை விவகாரத்தில் காங்கிரஸும் பாஜகவும் இணைந்து தமிழ்நாட்டிற்குத் துரோகம் இழைப்பதாகக் குற்றம்சாட்டிய அன்புமணி, இதுகுறித்து கேள்வி எழுப்பியதற்காகத் தன் மீது ஆவேசப்பட்ட காங்கிரஸ் தலைவர் மாணிக்கம் தாக்கூருக்குக் கடுமையான எச்சரிக்கை விடுத்தார். "நாங்கள் துப்பாக்கிச் சூடு, தடியடி, சிறைவாசம் என ராணுவத்தையே பார்த்தவர்கள்; தற்போது அமைதியான முறையில் ஆக்கபூர்வமான அரசியல் செய்து வருகிறோம்," என்று கூறிய அவர், பாமக தனித்து நின்று பல எம்.எல்.ஏ-க்களைப் பெற்றிருப்பதாகவும், காங்கிரஸால் தனித்து நின்று ஒரு கவுன்சிலர் பதவியைக் கூட பெற முடியாது என்றும் சவால் விடுத்தார்.
மேகதாது பிரச்சனைக்காக 'ஈகோ' பார்க்காமல் தமிழக முதலமைச்சர் அனைத்துக் கட்சி தலைவர்களையும் அழைத்துக்கொண்டு பிரதமரைச் சந்திக்க வேண்டும் எனக் கேட்டுக்கொண்டார். மேலும், வரவிருக்கும் கடுமையான வறட்சியைக் கருத்தில் கொண்டு, ரூ.15,000 கோடி செலவில் விவசாயிகளின் கூட்டுறவு வங்கிக் கடன்களை அரசு முழுமையாக ரத்து செய்ய வேண்டும் என்றும், சமூக நீதிக்கு எதிரான நீட் தேர்வை முற்றிலும் ஒழிக்க வேண்டும் என்றும் வலியுறுத்தினார். இறுதியாக, பாமக நிர்வாகிகள் சமூக வலைதளங்களில் மட்டும் இயங்காமல், கிராமப்புறங்களில் நிலவும் மக்களின் அடிப்படைப் பிரச்சனைகளைக் கண்டறிந்து நேரடியாகக் களத்தில் இறங்கிப் போராட வேண்டும் எனத் தொண்டர்களுக்கு அறிவுறுத்தினார்.
