Hyundai Motor India IPO: आगामी दोन ते तीन महिन्यांत अनेक दिग्गज कंपन्यांचे आयपीओ येणार आहेत. ह्युंदाई मोटर इंडिया लिमिटेड या कंपनीच्या आयपीओचीही गेल्या अनेक दिवासांपासून चर्चा आहे. ही एक वाहननिर्मिती करणारी कंपनी आहे. या कंपनीच्या आयपीओत गुंतवणूक केल्यास चांगला परतावा मिळू शकतो, अशी शक्यता व्यक्त केली जात आहे. असे असतानाच आता या आयपीओची संभाव्य तारीख समोर आली आहे. मिळालेल्या माहितीनुसार हा आयपीओ येत्या 14 ऑक्टोबर रोजी गुंतवणुकीसाठी खुला होऊ शकतो.

देशातला सर्वांत मोठा आयपीओ ठरणार

ह्युंदाई मोटर इंडिया लिमिटेड या कंपनीचा आयपीओ एकूण 25 हजार कोटी रुपयांचा असेल. भारतातला हा आतापर्यंतचा सुर्वांत मोठा आयपीओ असेल. याआधी भारतीय आयुर्विमा महामंडळाचा आयपीओ सर्वांत मोठा होता. या आयपीओचा आकार 21 हजार कोटी रुपये होता. मात्र आता ह्युंदाई या कंपनीचा आयपीओ एलआयसीपेक्षाही मोठा असणार आहे.

14,21,94,700 शेअर्स विकले जाणार

ह्युंदाई या कंपनीने आयपीओच्या परवानगीसाठी जून महिन्यात भारतीय भांडवली बाजार नियामक सेबीकडे अर्ज केला होता. त्यानंतर 24 सप्टेंबर रोजी या कंपनीच्या आयपीओला सेबीने मंजुरी दिली होती. या कंपनीकडून एकूण 14,21,94,700 शेअर्स विकले जाणार आहे. हे सर्व शेअर्स ऑफर फॉर सेल असतील. म्हणजेच या आयपीओत कोणताही नवा शेअर जारी केला जाणार नाही.

25,000 कोटी रुपये उभे करणार

सूत्रांनी दिलेल्या माहितीनुसार ह्युंदाई ही कंपनी प्रारंभिक समभाग विक्रीच्या माध्यमातून एकूण तीन अब्ज अमेरिकी डॉलर्स म्हणजेच साधारण 25,000 कोटी रुपये उभे करणार आहे. ह्युंदाई मोटर या कंपनीने 1996 साली भारतात उत्पादन घ्यायला सुरुवात केली होती. याआधी 2003 साली मारुती सुझुकी नावाची वाहननिर्मिती क्षेत्रातील कंपनी आपला आयपीओ घेऊन आली होती. त्यानंतर आता दोन दशकांनंतर वाहननिर्मिती क्षेत्रातील कंपनीचा आयपीओ येत आहे.

यावर्षी आयपीओंचे प्रमाण 29 टक्क्यांनी जास्त

दरम्यान, या वर्षी अनेक कंपन्यांनी शेअर बाजारावर सूचिबद्ध होण्यासाठी आयपीओ आणलेले आहेत. आतापर्यंत 62 कंपन्यांनी आयपीओच्या माध्यमातून एकूण 64 हजार कोटी रुपये उभे केले आहेत. 2023 साली एकूण 57 कंपन्यांचे आयपीओ आले होते. या कंपन्यांनी तेव्हा एकूण 49,436 कोटी रुपये उभे केले होते. या वर्षी आयपीओंचे हे प्रमाण 29 टक्क्यांनी जास्त आहे.

(टीप- शेअर बाजार, म्यूच्यूअल फंड हे जोखमीच्या अधीन असतात. या लेखात दिलेली माहिती ही प्राथमिक स्वरुपाची असून आम्ही कोणताही दावा करत नाही. या लेखामागचा गुंतवणुकीसाठी शिफारस, सल्ला देण्याचा उद्देश नाही. तुम्हाला गुंतवणूक करायची असेल तर या क्षेत्रातील तज्ज्ञांचा सल्ला घ्या.)

हेही वाचा :

एका वर्षात होणार मालामाल! ‘हे’ पाच स्टॉक तुम्हाला देतील दमदार रिटर्न्स

युद्धजन्य स्थितीत कोणत्या स्टॉकमध्ये गुंतवणूक करावी? ‘हे’ आहेत सर्वोत्तम 11 शेअर्स!

अधिक पाहा..