Pune News: प्रसिद्ध गरबा किंग नाचता-नाचता जमिनीवर पडला अन् पुन्हा उठलाच नाही, मृत्यूचा VIDEO कॅमेऱ्यात कैद
Garaba King Ashok Mali: सध्या देशभरात नवरात्रोत्सव सुरु आहे. दररोज ठिकठिकाणी गरब्याचे आयोजन केले जाते. अशाच एका कार्यक्रमात प्रसिद्ध गरबा डान्सर आणि गरबा किंग म्हणून ओळखले जाणारे अभिनेते अशोक माळी यांचे काल रात्री निधन झाले. मुलासोबत एका कार्यक्रमात गरबा डान्स करत असताना ही घडली.
मिळालेल्या माहितीनुसार गेली अनेक वर्षे अशोक माळी हे डान्सचे प्रशिक्षण देत असायचे. अनेक तरुणांना ते आपली कला शिकवत होते. त्यांनी आपल्या डान्सच्या कलेने समाजात एक विशेष ओळखही निर्माण केली होती. मात्र काल एका कार्यक्रमादरम्यान त्यांना हृदयविकाराचा झटका आला आणि त्यांचा जागीच मृत्यू झाला. या घटनेचा व्हिडिओ सोशल मीडियावर वेगाने व्हायरल होत आहे.
अशोक माळी मुलासोबत गरबा खेळत होते
अशोक माळी हे आपल्या गरबा नृत्यामुळे सोशल मीडियावर प्रसिद्ध होते. त्यामुळे ते पुणे शहरात गरबा किंग म्हणून ओळखले जायचे. शहरातील वेगवेगळे गरबा ग्रुप अशोक यांना त्यांच्या कार्यक्रमांसाठी आमंत्रित करायचे. सोमवारी रात्री अशोक यांना चाकण भागात गरबा डान्ससाठी बोलावले होते, त्यानंतर ते आपल्या मुलासोबत येथे गरबा डान्स करण्यासाठी आले होते. नवरात्रीनिमित्त आयोजित या कार्यक्रमात उपस्थित लोकांसमोर अशोक आपला मुलगा भावेशसोबत गरबा डान्स करत होते. यादरम्यान त्यांना हृदयविकाराचा झटका आला आणि ते अचानक खाली पडले.
मृत्यूचा लाईव्ह व्हिडिओ आला समोर
व्हिडिओमध्ये अशोक माळी लहान मुलासोबत गरबा खेळताना दिसत आहे. नाचताना ते अचानक जमिनीवर पडतात. हे सर्व अचानक घडल्यामुळे उपस्थित लोकांनाही काय झाले हे समजत नाही. त्यानंतर मंडळाचे कार्यकर्ते त्यांना तातडीने खासगी रुग्णालयात उपचारासाठी दाखल करतात मात्र डॉक्टरांनी त्यांना मृत घोषित केले.
अशोक अनोख्या गरबा नृत्यामुळे प्रसिद्ध होते
अशोक माळी हे आपल्या गरबा नृत्यामुळे अल्पावधीतच प्रसिद्ध झाले होते. त्यांनी सोशल मीडियाच्या माध्यमातून स्वतःची एक वेगळी ओळख निर्माण केली होती. त्यामुळे पुण्यातील लोक त्यांना गरबा किंग या नावाने ओळखत असायचे. अशोक माळी हे मूळचे धुळे जिल्ह्यातील शिंदखेडा तालुक्यातील होळे गावचे रहिवासी असून सध्या चाकण, पुणे येथे राहत होते. काल रात्री अशोक आपल्या मुलासोबत गरबा डान्स करत असताना त्यांचा मृत्यू झाला. गरबा किंगच्या निधनामुळे चाकण परिसरातील लोकांनी हळहळ व्यक्त केली आहे.