Mahayuti Seat Sharing Formula: राज्यातील विधानसभा निवडणूकीच्या घोषणेनंतर आता सर्वांचे लक्ष जागावाटपाकडे लागले आहे. महायुती आणि महाविकास आघाडीने अद्याप याबाबत कोणतीही घोषणा झालेली नाही. मात्र आता महायुतीचा जागावाटपाचा फॉर्मुला ठरला असल्याची माहिती समोर आली आहे. यानुसार भाजप सर्वाधिक जागा लढणार असल्याची माहिती समोर आली आहे.

भाजपला 160 जागा मिळण्याची शक्यता

समोर आलेल्या माहितीनुसार, आगामी विधानसभा निवडणूकीत भाजप 160 किंवा त्यापेक्षा अधिक जागा लढवणार असल्याची माहिती समोर आली आहे. तर मुख्यमंत्री एकनाथ शिंदे यांच्या शिवसेनेला 70 ते 75 जागा तर अजित पवारांच्या राष्ट्रवादीला 55-60 जागा मिळण्याची शक्यता वर्तवण्यात येत आहे. मात्र अजून यावर शिक्कामोर्तब झालेले नाही.

भाजपची पहिली यादी लवकरचं जाहीर होणार

भाजपची पहिली यादी लवकरचं जाहीर होणार आहे अशी माहिती समोर आली आहे. या यादीत विद्यमान आमदारांना संधी दिली जाण्याची शक्यता आहे. या यादीत 100 च्या आसपास नावांचा समावेश असण्याची शक्यता आहे. पहिल्या यादीनंतर मित्रपक्षांचीही यादी समोर येण्याची शक्यता आहे. त्यानंतर अंतिम जागावाटप पूर्ण झाल्यानंतर सर्वच पक्षांची समोर येणार आहे.

गद्दारी केली तर पक्षातून हकालपट्टी होणार - बावनकुळे

भाजपचे प्रदेशाध्यक्ष चंद्रशेखर बावनकुळे यांनी राज्यातील भाजपच्या कार्यकर्त्यांना इशारा दिला आहे. ‘महाराष्ट्रातील जनतेच्या विकासासाठी महायुती सरकार कटिबद्ध आहे. महायुती सत्तेत येण्यासाठी भाजप कार्यकर्त्यांनी शिवसेना आणि राष्ट्रवादी काँग्रेस यांचा प्रामाणिकपणे प्रचार करायचा आहे. कोणी गद्दारी केली, तर त्याला पक्षातून काढून टाकले जाईल,’ असं बावनकुळे यांनी म्हटले आहे.

महाराष्ट्राच्या निवडणुकीचं संपूर्ण वेळापत्रक

• निवडणुकीचं नोटिफिकेशन : 22 ऑक्टोबर 2024
• अर्ज दाखल करण्याची शेवटची तारीख : 29 ऑक्टोबर 2024
• अर्जांची तपासणी : 30 ऑक्टोबर 2024
• अर्ज मागं घेण्याची तारीख : 04 नोव्हेंबर 2024
• मतदान : 20 नोव्हेंबर 2024
• मतमोजणी : 23 नोव्हेंबर 2024

महाराष्ट्रातील मतदारांची संख्या

• एकूण मतदार - 9 कोटी 63 लाख
• नव मतदार - 20.93 लाख
• पुरूष मतदार - 4.97 कोटी
• महिला मतदार - 4.66 कोटी
• युवा मतदार - 1.85 कोटी
• तृतीयपंथी मतदार - 56 हजारांहून जास्त
• 85 वर्षावरील मतदार - 12. 48 लाख
• शंभरी ओलांडलेले मतदार - 49 हजारांहून जास्त
• दिव्यांग मतदार - 6.32 लाख

महायुतीकडे सध्या 187 जागा

• भाजप - 105
• शिवसेना (एकनाथ शिंदे) - शिंदे 40
• राष्ट्रवादी (अजित पवार) -42

महाविकास आघाडी सध्या 72 जागा

• काँग्रेस - 44
• शिवसेना ठाकरे गट - 16
• राष्ट्रवादी शरद पवार - 12