Shocking Crime News : शहरातील बेरोजगार तरुणांच्या खात्यांतून ही उलाढाल झाल्याची धक्कादायक माहिती समोर आली आहे. ज्यांच्या नावे हे व्यवहार होताहेत त्यांना मात्र या घटनेविषयी काहीच थांगपत्ताही नाही. शिवसेना पदाधिकारी व बेरोजगार तरुणांनी मालेगाव येथे पत्रकार परिषद घेत हे आरोप केले आहेत.

मालेगावातील 12 बेरोजगार तरुणांच्या नावावर बनावट कंपन्या तयार करून कुणाच्या नावावर 10 तर कुणाच्या नावावर 15 कोटी अशा रक्कमेपर्यंत व्यवहार नाशिक मर्चेंट बँकेच्या मालेगाव येथील शाखेत करण्यात आले असल्याची धक्कादायक बाब उघड झाली आहे.

या तरुणांना मालेगाव बाजार समितीत नोकरीचे आमिष दाखवत सिराज अहमद या इसमाने तरुणांचे आधार कार्ड, पॅन कार्ड आणि सह्या घेत नाशिक मर्चंट बँकेत (मालेगाव शाखा) बनावट खाती उघडली व त्या खात्यावरून गेल्या दहा ते पंधरा दिवसांमध्ये शेकडो कोटींचे आर्थिक व्यवहार केल्याचे समोर आले आहे.

पोलिसात तक्रार दाखलहा संपूर्ण प्रकार उघडकीस आल्यानंतर या 12 तरुणांनी मंत्री दादा भुसे यांच्याकडे धाव घेतली. या संपूर्ण प्रकरणाची चौकशी करण्याची मागणी त्या तरुणांनी केली आहे. या पार्श्वभूमी शिवसेना पदाधिकारी व बेरोजगार तरुण यांनी पत्रकार परिषद घेत मागणी केली.

दरम्यान, या प्रकरणी अपर पोलीस अधीक्षकांकडे लेखी तक्रार देण्यात आली असून हा व्यवहार कोणी केला? यामागे कोणाचा हात आहे? याबाबत पोलिसांकडून चौकशी सुरू करण्यात आली आहे.



बँकेचे म्हणणे काय?या प्रकरणावर बँकेने आपली बाजू मांडतांना सांगितले की, बँकेत रितसर कागदपत्रांच्या आधारे करंट अकाऊंट उघडण्यात आले आहे. त्यातील व्यवहार हे नियमित आहेत. ऑनलाईन व्यवहार असल्याने ते लगेचच लक्षात येत नाही. मात्र त्या मुलांनी मागणी केलेल्या अर्जाप्रमाणे त्यांना त्यांच्या खात्यांचे स्टेटमेंट देण्यात आले आहे. तसेच त्यांनी सांगितल्याप्रमाणे खाते आणि सध्याची खात्यातील रक्कम गोठवण्यात आली आहे.

दरम्यान, विधानसभा निवडणुकीच्या पार्श्वभूमीवर अवघ्या 15 दिवसांत 100 कोटी रकमेची खात्यातून उलाढाल होणे, आणि ज्यांच्या खात्यातून ती उलाढाल झाली त्यांना याविषयी माहीतच नसणे म्हणजे यात काहीतरी काळंबेरं नक्की आहे. या प्रकरणात पोलीस तपासात काय हाती लागते ते पाहणे आता महत्वाचे आहे.

या निमित्ताने आपण आपली वैयक्तिक माहिती देताना खबरदारी घ्यावी. एखाद्याला आपण आपली माहिती देत असू तर त्याची सत्यता एकदा पडताळून पाहणे हे आपल्याच हिताचे आहे. त्यामुळे काळजी घ्या आणि व्यवहार करताना सतर्क राहा.