Umraga Vidhansabha Election : महाराष्ट्र विधानसभा निवडणुकीसाठी 20 नोव्हेंबर रोजी मतदान प्रक्रिया पार पडणार आहे. या निवडणुकीत महाविकास आघाडी, महायुती, तिसरी आघाडी, मनसे, वंचित बहुजन आघाडी असे अनेक राजकीय पक्ष मैदानात आहेत. त्यामुळे बऱ्याच मतदारसंघात तिरंगी किंवा चौरंगी लढती होणार आहेत.
धाराशिव जिल्ह्यात एकूण चार विधानसभा मतदारसंघ आहेत. यातील 2 मतदारसंघात ठाकरेंची शिवसेना विरुद्ध शिदेंची शिवसेना असा सामना रंगणार आहे. कळंब धाराशिव विधानसभा मतदारसंघात ठाकरेंची कैलास पाटील विरुद्ध शिंदेंचे अजित पिंगळे असा सामना रंगणार आहे. दुसरा मतदारसंघ म्हणजे उमरगा...उमरगा विधानसभा मतदारसंघात (Umraga Vidhansabha Election ) देखील ठाकरे शिवसेना विरुद्ध शिंदेंची शिवसेना असा सामना रंगणार आहे.
उमरगा विधानसभा मतदारसंघात (Umraga Vidhansabha Election ) ठाकरे गटाकडून प्रवीण स्वामी यांना उमेदवारी देण्यात आली आहे. तर शिंदेंच्या शिवसेनेकडून ज्ञानराज चौगुले यांना मैदानात उतरवण्यात आले आहे. ज्ञानराज चौगुले हे एकनाथ शिंदे यांनी बंड केल्यानंतर ठाकरेंची साथ सोडलेले आमदार आहेत. त्यामुळे ज्ञानराज चौगुले यांना ठाकरेंची साथ सोडल्याचा फटका बसणार का हे पाहाणे देखील महत्त्वाचे ठरणार आहे. ठाकरेंची खासदार प्रचार सभेत 50 खोक्के घेतल्याचे आरोपही चौगुले यांच्यावर करताना दिसत आहेत.
लोकसभा निवडणुकीत धाराशिवमध्ये ठाकरेंचे उमेदवार ओमराजे निंबाळकर यांना तीन लाखांपेक्षा जास्त लीड मिळाला होता. त्यामुळे अनेक मतदारसंघात महाविकास आघाडीला चांगले वातावरण असल्याचे बोलले जाते. याशिवाय धाराशिवमधील 4 मतदारसंघात मराठा आरक्षणाचा मुद्दा चांगलाच तापलेला आहे. हे लक्षात घेत ज्ञानराज चौगुले यांनी मराठा आंदोलक मनोज जरांगे पाटील यांची भेट घेतली होती.
मराठा आरक्षणाचा मुद्दा संपूर्ण मराठवाड्यात महत्त्वाचा ठरणार आहे. लोकसभा निवडणुकीत मराठा आरक्षणाचा मुद्दा धाराशिव, बीड, नांदेड, परभणी, हिंगोली, छत्रपती संभाजीनगर,लातूर आणि सोलापूर अशा सर्वच जिल्ह्यात महत्त्वाचा ठरला होता. अंतरवाली सराटी येथे झालेल्या लाठीचार्जचा फटका महायुतीला लोकसभा निवडणुकीत बसला आहे. याशिवाय मनोज जरांगे यांनी उमेदवार दिलेले नसले तर भाजपचे उमेदवार पाडण्याचे आवाहन यापूर्वी त्यांनी सातत्याने केले आहे.
इतर महत्त्वाच्या बातम्या
इथं दोघांना पाडा, येवल्यातून मनोज जरांगेंचं मराठा बांधवांना आवाहन; हाती 2 माईक घेऊन भुजबळांना टोला
