இந்தியாவின் மிகப்பெரிய தொழிலதிபரான முகேஷ் அம்பானி தலைமையிலான ரிலையன்ஸ் இண்டஸ்ட்ரீஸ் நிறுவனத்தின் துணை நிறுவனமான ரிலையன்ஸ் டிஜிட்டல் ஹெல்த் லிமிடெட் (ஆர்டிஹெச்எல்), ஹெல்த் அலையன்ஸ் குரூப் இன்க் நிறுவனத்தில் 45 சதவிகித பங்குகளை வாங்க உள்ளதாக தெரிவித்துள்ளது. இதற்கான ஒப்பந்த பணிகள் மேற்கொள்ளப்பட்டு வருவதாகவும், இதன் மதிப்பு மொத்தம் $10 மில்லியன் என்றும் தெரிவிக்கப்பட்டுள்ளது. ஹெல்த் துறையில் மிகப்பெரிய தேவை உள்ளது. அதிலும் நோய்களை கண்டறிதல் உள்ளிட்ட சில பிரிவுகளில் பெரும் தேவை உள்ளது. அதாவது ரிலையன்ஸ் டிஜிட்டல் மெய்நிகர் நோயறிதல் மற்றும் பராமரிப்பு தளத்தை உருவாக்க உள்ளது. மேலும் பின்தங்கிய மக்கள் தரமான சுகாதாரம் கிடைக்கும் பணிகளை மேற்கொள்ள உள்ளதாகவும், இதற்காக அதிக முதலீடு செய்ய உள்ளதாகவும் பங்குச்சந்தைகளுக்கு தெரிவிக்கப்பட்டுள்ளது. இந்த நிலையில் ரிலையன்ஸ் டிஜிட்டல் ஹெல்த் அலையன்ஸ் குழுமத்தின் பங்குகளை வாங்குகிறது. நிறுவனத்தின் பங்குகளை வாங்குவதற்கு வழக்கமான நிபந்தனைகளுக்கு உட்பட்டு செயல்படுத்தப்படும் என்று தெரிவிக்கப்பட்டுள்ளது. இந்த பரிவர்த்தனைக்கு அரசு, ஒழுங்குமுறை ஒப்புதல்கள் எதுவும் தேவையில்லை என்றும் ரிலையன்ஸ் இண்டஸ்ட்ரீஸ் தெரிவித்துள்ளது.ஜூலை முதல் செப்டம்பர் வரையான காலாண்டில் ஒருங்கிணைந்த நிகர லாபம் ரூ.19,820 கோடியாக இருந்தது. ஒரு வருடத்திற்கு முந்தைய காலாண்டில் 3.6 சதவீதம் குறைந்துள்ளது. நிறுவனத்தின் ஒருங்கிணைந்த லாபம் 9.5 சதவீதம் உயர்ந்துள்ளது. 2024-25ம் நிதியாண்டில் முதல் காலாண்டில் நிறுவனம் ரூ.17,448 கோடி லாபம் ஈட்டியுள்ளது. வெள்ளிக்கிழமை ரிலையன்ஸ் இண்டஸ்ட்ரீஸின் பங்கு பிஎஸ்இ சந்தையில் இரண்டு சதவீதம் குறைந்து ரூ. 1,206 ஆக இருந்தது.