New Year Resolution for Mental Health: नवीन वर्षात पाऊल टाकताना प्रत्येकजण वेगवेगळ्या योजना आखतात, नवीन् वर्षात काय करायचे? कोणती गोष्ट साध्य करायची? तसेच कोणत्या गोष्टीकडे दुर्लक्ष करायचे? या सर्व गोष्टींची यादी बनवली जाते. यासाठी काही संकल्प रचले जातात. मात्र या सर्व प्रयत्नांमध्ये आपण आपले मानसिक आरोग्य बिघडवून बसतो. आयुष्यात कोणतीही गोष्ट मिळवण्यासाठी केवळ शारीरिक नव्हे तर मानसिक आरोग्य देखील सुधारणे गरजेचे असते, पण त्याकडे पूर्णपणे दुर्लक्ष केले जाते. त्यामुळे, दरवर्षीप्रमाणे तुम्ही येत्या वर्षातदेखील स्वतःमध्ये सुधारणा करण्यासाठी नवीन वर्षाचे संकल्प करणार असाल, आणि स्वतःच्या जीवनातील प्रत्येक पैलूचा विचार करत असाल तर मानसिक आरोग्य जपत असल्याची देखील खात्री करा. आज आम्ही या लेखाच्या माध्यमातून मानसिक आरोग्य सुधारण्यासाठी नवीन वर्षाचे काही संकल्प घेऊन आलो आहोत, जे तुमचे मानसिक आणि शारीरिक आरोग्य सुधारण्यास आणि आयुष्य सुखकर करण्यास तुम्हाला मदत करू शकतील.

मानसिक आरोग्य राखण्यासाठी हे संकल्प ठरतील फायदेशीर
उत्तम आरोग्यासाठी आणि कार्यशीलतेसाठी मानसिक आरोग्य उत्तम असणे महत्वाचे आहे, आणि त्यासाठी नवीन वर्षामध्ये तुम्ही खालीलप्रमाणे काही संकल्प करू शकता.


नकारात्मक लोकांपासून दूर राहणे
तुमच्या आजूबाजूच्या लोकांमुळे तुमच्या मानसिक आरोग्यावर परिणाम होतो. जर तुमचे मित्र, नातेवाईक किंवा तुमचे सहकारी तुम्हाला चांगली वागणूक देत नसतील तर त्यांच्यापासून दूर राहणे चांगले. अशा लोकांमुळे तुमचा तणाव वाढतो आणि तुमच्या आयुष्यात खूप नकारात्मकताही येते. त्यामुळे अशा लोकांपासून दूर राहण्याचा संकल्प यंदा घ्या.


स्वत: ची काळजी घेणे
अनेक वेळा आपण इतरांचा विचार करून स्वतःची काळजी घ्यायला विसरतो. त्यामुळे त्याचा फटका मानसिकतेवर पडतो. स्वतःची काळजी न घेतल्याने तुमचे मानसिक आरोग्य बिघडते. म्हणून स्वत:ची काळजी घेणे हा तुमच्या संकल्पाचा भाग बनवा.


सकाळी लवकर उठणे
नवीन वर्षात सकाळी लवकर उठण्याचा संकल्प करा. सकाळी लवकर उठल्यामुळे सकाळची शांतता तुमचे मन फ्रेश करण्यास मदत करते. तुम्हाला स्वतःची काळजी घेण्यासाठी पुरेसा वेळ मिळतो.

हे देखी वाचा:

मदत मागणे
अनेकदा आपण विचार करतो की आपण कोणाकडे मदत मागितली तर ती व्यक्ती आपल्याला कमकुवत किंवा मूर्ख समजेल. त्यामुळे आपला ताण वाढतो आणि आपण इतर मानसिक आरोग्य समस्यांनाही बळी पडू शकतो. म्हणून जर तुम्हाला एखाद्या गोष्टीची गरज असेल तर निसंकोचपणे मदत मागा. यामुळे तुमचा ताण कमी होईल आणि तुम्हाला बरे वाटेल.


झोपेला प्राधान्य देणे
झोपेच्या कमतरतेमुळे तुमच्या मानसिक आरोग्यावर खूप परिणाम होतो. झोपेच्या कमतरतेमुळे तणाव आणि चिंता वाढते, जे मानसिक आरोग्यासाठी हानिकारक असतात. त्यामुळे, तुमच्या संकल्पामध्ये पुरेशी झोप समाविष्ट करणे तुमच्या मानसिक आरोग्यासाठी फायदेशीर ठरू शकते.

हे देखील वाचा:

साहित्य वाचन
सकारात्मक, प्रेरणादायक आणि मानसिक विकासाच्या दृष्टीने उपयुक्त असलेली पुस्तकं वाचा. वाचन तुमच्या मानसिक आरोग्यासाठी उत्तम आहे. त्यामुळे मोबाईलचा स्क्रीन टाइम मर्यादित ठेवून नवीन वर्षात किमान एक तास नियमित पुस्तक वाचण्याचा संकल्प करा.


शारीरिक व्यायाम
मानसिक आरोग्याच्या दृष्टीने शारीरिक व्यायाम अत्यंत महत्त्वाचा आहे. त्यासाठी तुम्ही जीममध्ये जाऊन कठोर वर्कआऊट करा असा याचा अर्थ होत नाही. तर दररोज किमान 30 मिनिटे चाला, योग किंवा व्यायाम करा. हे तुमच्या मूडला उत्तेजित करेल आणि तणाव कमी करेल.

यापैकी एक संकल्प जरी तुम्ही यशस्वीरित्या पूर्ण केला तरी तुमचे मानसिक स्वास्थ्य चांगले राहण्यास, आणि नवीन वर्षात अपेक्षित यश मिळवण्यास तुम्हाला मदत मिळू शकते.

(अस्वीकरण: लेखात नमूद केलेला सल्ला आणि सूचना केवळ सामान्य माहितीच्या उद्देशाने आहेत. हा व्यावसायिक वैद्यकीय सल्ला म्हणून घेऊ नयेत. आपल्याला काही प्रश्न किंवा चिंता असल्यास, नेहमी आपल्या डॉक्टरांचा सल्ला घ्या.)