मुंबई : देशातील अनेक कंपन्या दिवाळीला आपल्या कर्मचाऱ्यांना आकर्षक भेटवस्तू देतात. काही कंपन्यांनी दिलेल्या भेटवस्तूंची माेठी चर्चा होते. यामध्ये मर्सिडीज, दागिने, रोख इत्यादी गोष्टींचा समावेश आहे. याद्वारे या कंपन्या आणि कर्मचारी प्रसिद्धीच्या झोतात येतात. आता असाच प्रकार घडला आहे. चेन्नईमधील एका कंपनीने ख्रिसमसनिमित्त आपल्या कर्मचाऱ्यांना महागडी भेट दिली आहे. सर्माउंट लॉजिस्टिक सोल्युशन्स प्रायव्हेट लिमिटेड (Surmount Logistics Solutions Private Limited) ने आपल्या कर्मचाऱ्यांना कंपनीप्रती केलेल्या मेहनतीची आणि समर्पणाची ओळख म्हणून कार आणि मोटारसायकल भेट दिल्या आहेत. कंपनीच्या एका उच्चपदस्थ अधिकाऱ्याने रविवारी ही माहिती दिली. कर्मचाऱ्यांना प्रोत्साहन देण्यासाठी त्यांना महागड्या भेटवस्तू देण्यात आल्याचे त्यांनी सांगितले. कंपनीच्या 20 कर्मचाऱ्यांना उद्दिष्ट साध्य करण्यास प्रेरित करण्यासाठी टाटा कार, ॲक्टिव्हा स्कूटी आणि रॉयल एनफिल्ड बाइक भेट देण्यात आली.चेन्नई मुख्यालय असलेली कंपनी म्हणजे सर्माउंट लॉजिस्टिक सोल्युशन्स प्रायव्हेट लिमिटेड मालवाहतूक विलंब, पारदर्शकतेचा अभाव आणि अकुशल पुरवठा साखळी उपाय यांसारख्या लॉजिस्टिक क्षेत्रातील सामान्य आव्हानांवर उपाय प्रदान करते. कंपनीचे संस्थापक आणि एमडी डेन्झिल रायन यांनी निवेदनात म्हटले की, आमचे ध्येय सर्व आकारांच्या व्यवसायांसाठी लॉजिस्टिक सुलभ करणे आहे. पारंपारिक मालवाहतूक आणि लॉजिस्टिक प्रक्रियेतील अडचणी आम्हाला समजतात. आमचे उद्दिष्ट केवळ कार्यक्षम नसून पर्यावरणाबाबत जागरूक असणारे उपाय प्रदान करणे हे आहे.कर्मचाऱ्यांना महागड्या भेटवस्तू देण्याबाबत ते म्हणाले की, अशा उपक्रमांमुळे कर्मचाऱ्यांचे समाधान तर वाढते. शिवाय उत्पादकता आणि कंपनीशी त्यांची जोडही वाढते. प्रेरित कर्मचाऱ्यांकडून सर्वोत्तम कामगिरीची अपेक्षा असते.