भारतीय समाज हा विविध जाती-धर्मांचा समावेश असलेला समाज आहे.

भारतात पूर्वी पुरुष मंडळी अनेक महिलांशी लग्न करायचे पण त्यावेळी विवाहासंबंधी कायदे कानून नव्हते.

आता स्वतंत्र भारतात प्रत्येक धर्माचे पर्सनल लॉ अस्तित्वात आहेत. तसंच सर्वांसाठी असा फौजदारी कायदाही आहे.

हिंदू विवाह कायदा १९५५च्या कलम १७ अंतर्गत पुरुषानं किंवा महिलेनं लग्न झालेलं असताना अन् त्यातून कायदेशीरित्या मुक्त झालेलं नसताना दुसरं लग्न करणं गुन्हा आहे.

जर या कायद्याचं उल्लंघन झालं तर ७ वर्षांची तुरुंगवासाची शिक्षा अन् दंड होऊ शकतो किंवा दोन्हीही शिक्षा होऊ शकतात.

पण असं असतानाही आपल्याला आपल्या आजुबाजुला दोन बायका असलेले अनेक पुरुष दिसतात. असे दोन बायका असलेले अनेक पुरुष मंडळी राजकारणातही आहेत.

पण तरीही त्यांच्यावर कारवाई का होत नाही? असा प्रश्न आपल्याला पडतो. याच प्रश्नाचं उत्तर आपण जाणून घेणार आहोत.

खरंतर दुसरं लग्न करणं हा गुन्हा असला तरी तो अदखलपात्र गुन्हा समजला जातो. त्यामुळं पहिल्या बायकोनं तक्रार केल्याशिवाय पोलीस यामध्ये कारवाई करत नाहीत.

पण जर पहिल्या बायकोनं साधी तक्रारही दिली तर पोलिसांना या प्रकरणाचा तपास करणं बंधनकारक असतं.

आयपीसीच्या कलम ४९४ अंतर्गत एकाचवेळी दोन विवाहांची व्याख्या करण्यात आली आहे.